Ez dute asteburu onena izan, Hernaniko eta Mundarroko futbol talde nagusiek. Etxeko bi partiduak berdindu, eta kanpoko biak galdu dituzte.
Aukera ona zeukaten Zubipen, Hernaniko mutilen ohorezko erregionalek, eta Liga Nazionaleko jubenilek. Sailkapenean nahiko beheran zegoen taldea hartu zuten erregionalek, Elgoibar; baina ezin izan zuten garaipena lortu. Gol ikusgarri batekin aurreratu zen Hernani, aurreneko zatian: gol olinpikoa lortu zuen Mikel Lizarazu; kornerretik zuzenean barrura, alegia. Baina bigarren zatian, buruz berdindu zuen Elgoibarrek, eta Hernanik aukera garbiak izan bazituen ere, ezin izan zuen garaipenaren gola lortu (1-1).
Paretsu dabilen taldea izan zuten aurrean, aldiz, jubenilek. Antiguokoren kontra jokatu zuten, eta golik gabe berdindu zuten (0-0).
Leioan ezin, neskek
Kontrario zuzen bat izan zuten aurrean, baita ere, Euskal Ligako neska hernaniarrek. Baina etxetik kanpo aritu ziren haiek, Sarriena zelaian, Leioako Emakumeak taldearen kontra. Elkarren segidan zeuden sailkapenean, puntu bakarreko aldearekin, hernaniarrak aurretik. Baina ezin izan diote postuari eutsi hernaniarrek, 2-0 galdu ondoren: elkarren segidan jarraitzen dute, baina bi puntu aurretik daude bizkaitarrak, orain.
Eta etxetik kanpo galdu zuten, Mundarroko mutilek ere, erregional preferenteen mailan. Lasarten jokatu zuten moreek, Ostadarren kontra, eta 3-1 galdu zuten. Partidu zaila zuten, bigarren dagoen taldearen zelaian; baina gogotsu atera ziren astigartarrak, eta aukera garbiak izan zituzten aurreratzeko, baina atezainak gelditu zituen. Lasartearrek, ordea, aurreneko aukeran asmatu zuten. Kolpeari primeran erantzun zioten moreek, eta bi aukera garbi izan ondoren, hirugarrenean berdindu zuen Oierrek, atsedenaren aurretik.
Astigartarrek izan zuten aurreneko gol aukera, bigarren zatian ere; baina berehala, bi gol egin zituen Ostadarrek, minutu gutxitan. Gehiago kosta zitzaien moreei, orduan, joko ona berreskuratzea; eta aukera pare bat izan arren, primeran aritu zen atezain lasartearra, berriro.