Ez dute aho zapore berarekin bukatu asteburua, bailarako saskibaloi taldeek. Mundarrorena ia borobila izan da, infantil mailan bakarrik galdu baitu. Hernanik, ordea, kadeteetan bakarrik irabazi du.
Mundarroko neskak, garaiezinak
Denetan emaitza borobilenak lortu dituztenak Mundarroko nagusien mailako neskak izan dira. Cafes Aitonari 35 eta 54 irabazi diote.
Horrela, sailkapeneko bigarren postuan dago taldea, aurrenekoarekin, Goierrirekin, berdinduta. Orain arteko lau partiduak irabazi dituzte.
Mutilek, bestalde, bi puntuko aldearekin irabazi diote Debasketi, 70-68. Garaipen garrantzitsua izan da ezbairik gabe, sailkapenean 12garren baitira, azkenaurrenetik puntu bakarrera. Bost partidu galdu dituzte orain arte, eta bi irabazi, azken hau barne.
Hernani, pattal
Bestelakoa izan da guztiz asteburua, hernaniarrentzat. Dena den, mutilen aurreneko taldeak lan txukuna egin zuen, liderraren kontra hiru puntuko aldearekin bakarrik galdu baitzuen; 43-46 gailendu zen Take Orbela. Horrela, hernaniarrak sailkapeneko erdipareko postuan daude, zortzigarren, hiru garaipen eta lau porrotekin.
Garaipen bakarra kadeteena izan da, 53-28, Easoren kontra. Seniorretako bigarren taldeak ere galdu egin du, eta azkena da.