Ekitaldi berezia antolatu du ostiralerako Tokikomek: Tokikom Sariak banatuko ditu euskerazko toki komunikabideetan 2019an egindako lanen artean, Basauriko Ibaigane kultur etxean egingo duen ekitaldian. Horietako bat irabazteko izendatuetako bat da Kronika.
TOKIKOM SARIAK
Euskerazko toki komunikabideetan lanean aritzen diren 200 profesionaletik gora batzen ditu Tokikomek. Horien artean banatuko dira Tokikom Sariak ostiralean, Basaurin egingo den ekitaldian. Izendatuak dira:
Eduki onena:
-Kronikaren Urik gabeko urtegi, orain laborategi (2019-03-16).
-Guaixeren 1918ko dolu egunak.
-Uztarriaren Heriotza parez pare.
Azalik onena:
-Barrenen Krosaren egun handia.
-Guaixeren Bizipozez bizi.
-Puntuaren Antropozentroa.
Ikus-entzunezko onena:
-28 Kanalak, Erlo TBk, GiTB eta Goienak ekoitzitako Euskaraldia.
-Aiaraldearen Bizitzak erdigunera eraman dituzte milaka emakumek.
-Goienaren Debagoiena eraldatzen.
Hitzordua aprobetxatuta, gainera, sektorearen inguruko hausnarketa jardunaldiak egingo ditu, albiste faltsu eta zurrumurruak ardatz. Bertan hartuko dute parte Maldito Bulo, Euskaltzaleen Topagunea eta ZAS! Zurrumurruen Aurkako Sareko adituek. Azken honetako ordezkari izango da Hernaniko Udaleko Kulturartekotasun, Lankidetza eta Berdintasun Arloko teknikaria, Irantzu Jauregi Artola. Zurrumurruen aurka egiteko komunikabideek ardura haundia dutela uste du, eta, tokiko komunikabideek «ahalmen haundia».
Sare anitza
Sortu zenetik, ZAS! Zurrumurruen Aurkako Sarea anitza izan dela dio Irantzu Jauregi Artolak. «Mota ezberdinetako eragileekin sortu zen sare bat da. Hori du ezaugarrietako bat, eta aldi berean, aberastasuna eta zailtasuna ditu». Eragileen artean udalerriak daude. Bestetik, beste eragile mota batzuk, «mugimendu sozialei lotutakoak». Eta bestalde, «gai hauetan lanean aritzen diren elkarte eta aholkularitzak».
«Gora egiten ari dira ahots arrazistak. Behar horretatik abiatu zen ZAS!; ikusi genuen ofentsiba bat bazetorrela»
Jauregik Hernaniko Udaleko Kulurartekotasun Arloko ordezkari gisa hartzen du parte bertan. «Udal hauek gaude etorkin edo etorri berriekiko zurrumurruen aurkako lanketa egiteko asmoz. Lehendik egiten genuen zerbait zen, eta iruditzen zitzaigun sarean ere egon behar genuela». 2016an egin zen adierazpen publiko bat onartuta hasi zen Udala parte hartzen. «Azken urteetan gora egiten ari dira ahots arrazistak, alderdi politiko batzuek ere egiten dituzte adierazpen xenofobo eta arrazistak... Behar horretatik abiatu ginen. Ikusi genuen ofentsiba bat bazetorrela, eta horri aurre egiteko ardura hartu behar genuela, giza eskubideak jokoan zeudelako».
Hausnarketa prozesu bat egin dute aurten; erabaki dute «idazkaritza tekniko bat kontratatzea». Era berean, «estatutua onartu eta egitura zehaztu da: talde motorea, asanbladak, lan taldeak...».
Amher giltzarri, Hernanin
Baina sarean ez ezik, herrian bertan lan egiten jarraitzen du Hernaniko Udalak. Izan ere, «Hernanin gertatzen da Euskal Herrian edo estatu mailan gertatzen dena. Badaude zurrumurruak etorri berriekiko, etorri berrien artean ere bai... Komentario, gutxienez, xenofoboak, estereotipoetan eta zurrumurruetan oinarrituak. Kezkatzen gintuen zerbait zen, uste eta nahi baino zabalduago baitaude; etxeak ematen dizkietela etorkinei, dirulaguntzengatik etortzen direla, lana kentzen digutela... Komentario horiek ez daude urruti, ez dira bakarrik eskuin muturrarekin lotzen ditugun alderdi politikoenak. Gertuago ere entzuten dira, nahiz eta datuekin ez datozen bat. Egin diren ikerketetan ikusten da jendea ez dela etortzen dirulaguntzengatik, baizik eta bere bizi maila hobetzeko, denok nahi dugun bezala».
Horrelakoei aurre egiteko Udalak hainbat ekimen jarri izan ditu martxan, eta horien artean aipatzekoa da, Jauregiren esanetan, «Amher-SOS Arrazakeriarekin duen hitzarmena, etorri berriei aholkularitza eskaintzeaz gain, honek bizikidetza sustatzea eta arrazismoari aurre egitea dituelako helburu». «Iruditzen zaigu bizikidetza berak, elkarlanean aritzeak, estereotipo horiek hausten dituela. Zenbat eta gutxiago izan bata bestearen berri, indartu egiten dira. Baina ezagutzen duzunean jendea, ikusten duzu ez garela hain ezberdinak, antzeko nahiak ditugula».
Kontziente izatearen garrantzia
Lan hori egiteko, ordea, ez da erakundeen zain egon behar, norbanakoak ere ardura haundia baitauka. Horretan eragiten du ZAS!ek, eta asteburuan, adibidez, hainbat herritan egingo den Bizilagunak ekimena sustatu du; «zurrumurruen aurkako ekimen bat litzateke, mahai baten bueltan etorkinak eta bertan jaiotakoak elkartzen baititu, elkar ezagutuz estereotipoak deseraikitzeko asmoz».
«Herritarren pentsamenduan eragiteko ardura haundia daukate komunikabideek»
Horrez gain, Hernanin bertan egin izan diren formazio saioak azpimarratzen ditu Jauregik. Batetik, zurrumurruei aurre egiteko datuak eman ziren, eta bestetik, saio praktikoetan «bakoitzak eduki ditzakegun estereotipoak berrikustea» izan zen helburua, «ditugun estereotipoez jabetzeko. Kuriosoa da nola funtzionatzen dugun. Zerbaitegatik barneratu ditugu zurrumurruak. Komunikabideetan ikusten da. Ikusi berri dut albiste bat, Frantzia migranteen etorrera lan eskaintzaren arabera nola erregulatzen ari den azaltzen duena, eta hurrengo albistean estatu mailako langabezi tasaz aritu dira. Albiste desberdinak dira, baina bata bestearen atzetik emanda, kontziente edo inkontzienteki, hartzailearentzako mezua zabaltzen ari dira. Psikologikoki ere, uste horiek baliagarri egiten zaizkigu, besteen gainetik jartzeko edo zure egoera sozioekonomikoarekin etsita eta amorratuta bazaude, amorru hori egoera txarragoan daudenen aurka zuzentzeko, errudun bila. Komunikabide batzuek hori kontzienteki egiten dutela pentsatzen dut, eta ardura erabakiak hartzen dituzten horietan bilatu beharrean, amorrua hara bideratu beharrean, baliabide gutxiago dutenengana bideratzea bilatzen dutela».
Horri aurre egiteko «kontziente» izan beharra nabarmentzen du. «Kontziente egin ezean, gauza batzuk erreproduzitzeko joera daukagu: hitz egiteko moduak, espresioak... Eta komunikabideek ardura haundia daukate, herritarren pentsamenduan eragiteko. Laugarren boterea dira». Tokiko hedabideen jardunaldiei begira, herri komunikabideek haundiekiko duten aldea ere nabarmentzen du. «Herri komunikabideek ahalmen haundia daukate eragiteko, herritarrek oso gertu sentitzen baitituzte. Horregatik, uste dut ondo dagoela beti berrikuspenak egitea, baina baita norberak ere! Gauza batzuk barneratuta dauzkagu, eta ez gara jabetzen erreproduzitzen ditugula, kontziente egin behar duzu, ezer aldatzeko».