Seguru ziren Eñaut Martikorena hernaniarra eta Agin Laburu astigartarra, Gipuzkoako Bertsolari Txapelketaren azkenaurreko fasean; eta batu egin zaizkie, Iraulio Panttalone bertso eskolako beste hiru ordezkariak ere. Final laurdenetan aritu diren guztiek egin dute aurrera, hortaz.
Martikorenak eta Laburuk bezala lortu du txartela, Beñat Gaztelumendik ere: bere saioa irabazita. Erraz egin zuen bertsotan añorgarrak, larunbat arratsaldean, Azkoitiako Baztartxo antzokian; eta ia ariketa guztietan puntuazio altuena lortuta, nabarmen nagusitu zen, 475 punturekin. Bigarrenak, Ane Labaka lasartearrak, 455 puntu lortu zituen... Eta saio horretako beste inor ez da sailkatu.
Izan ere, puntuazio bajuak lortu zituzten, gainerako partehartzaileek; eta horri esker sailkatu dira Hernaniko bertso eskolako beste bi kideak ere: 14garren postuan egin du aurrera Asier Azpiroz zubietarrak (458,5 puntu), eta azkeneko pasea eskuratu du Unai Gaztelumendi añorgarrak (451,5 puntu), 18garren, hurrengoari puntu erdiko aldea aterata.
Arrasaten eta Oiartzunen zita, bertso eskolakoek
Hiru finalerdi jokatuko dira orain, baina horietako bitan daude banatuta, Hernaniko bertso eskolako bostak. Arrasaten ariko dira Laburu, Martikorena eta Unai Gaztelumendi, azaroaren 17an, arratsaldeko 17:00etan Uarkape frontoian. Eta Oiartzunen daukate hitzordua Azpirozek eta Beñat Gaztelumendik, hilaren 24an, ordu berean Elorsoro kiroldegian.
Bi saioetarako sarrerak, dagoeneko salgai daude, bertsosarrerak.eus atarian. Helduenak 13 euro dira, eta 6 eta 16 urte bitarteko gazteenak 7 euro.
Hiru finalerdietako irabazleak, zuzenean pasako dira finalera; eta haiekin batera, puntuazio altuena lortzen duten beste bost bertsolariak, abenduaren 14an Ilunben ariko den zortzikotea osatzeko. Horretarako ere, sarrerak salgai.