Larunbatean jokatu zen, afari baten bueltan, Xalaparta elkarteko sagardo lehiaketa, Hernanin. Eta 10 sagardotegiren artean, Andoaingo Gaztañagak jaso zuen sari potoloena.
1.151 punturekin izan zen txapeldun Gaztañaga, eta oso gertu izan zuen Astigarragako Lizeaga, lau puntura bigarren, 1.147rekin. Zubietako Astiazaran-Iruin izan zen hirugarren, 1.129 puntu lortuta.
Elkarteak nabarmendu du, «maila haundiko sagardoak» dastatu zituztela, «bertaratuen komentarioetatik ondorioztatu daitekeen bezala».
Gerardo Plaza, Joxan Imaz, Iñaki Aginagalde eta ‘Katxola’, omenduta
Edizio borobila zuen sagardo lehiaketak, 25garrena; eta berezia izanik, omendu eta gogoan izan zituzten, lehiaketa sortu zutenak: Gerardo Plaza, Iñaki Aginagalde eta Joxan Imaz. Eta gogoan izan zuten, baita ere, Katxola zena, Zelaia sagardotegiaren ordezkari gisa bertaratzen zena, eta orain gutxi hil zena.
Lehiaketaren afarirako, jendez bete zen Xalaparta elkartea, eta «giro ederrean» egin zuten, Iker Osa eta Iñaki Zelaia bertsolariek lagunduta. Eta nabarmendu dute, sagardoak bakarrik ez, bertaratuek dastatu zuten afaria bera ere «aparta» izan zela.