Pasa den aste makala osatu dute C.D. Hernaniko pelotariek. «Ahazteko moduak» kirol arduradunen esanetan. Torneo pribatuetan hiru partidu irabazi dira eta bi galdu, baina txapelketa ofizialetan lau partidu irabazi dira eta hamalau galdu. Guztira, asteburuan 16 partidu galdu dituzte Hernaniko klubeko pelotariek eta zazpi irabazi.
Emaitzarik esanguratsuenak Oiartzabal eta Etxarri jubenilek eta Salaberria eta Insausti nagusiek lortu dituzte Gipuzkoako Txapelketan. Bi bikoteek txapelketako partidu guztiak irabazi dituzte eta aukera asko dituzte finalerdietara sailkatzeko.
Mundarroko Lizeaga anaiek ere asteburu borobila osatu dute eta hauek ere jubeniletan 22-8 irabazi zuten Murumendiren kontra eta hauek ere finalerdiak oso gertu dituzte.
Oso garrantzitsua izan zen baita Urkizu eta Labaka seniorrek lorturiko garaipena, tanto bakarrarengatik, Errenterian. Emaitza horrekin jaitsierako promozioa sahiestu dute eta beste urte betez lehenengo mailan jokatuko dute.
Garaiar eta Alegria kadeteen eta Arizmendi eta Altuna nagusien porrotak izan ziren emaitzarik txarrenak. Bi bikoteeri zaildu egin zaie azken fasea jokatzeko aukera.
Juanito Alvarez finala galdu, Egian
Bestetik, albisterik okerrena Egiatik iritsi zen. Juanito Alvarez Torneoko finalean Ioritz Arrieta eta Markel Lizeaga bikote hernaniarrak 22-9 galdu zuen Urbieta II eta Irazustabarrenaren kontra.
Ez zuten bere egunik hoberena izan bi pelotari hernaniarrek eta aurkariak baino gutxiago izan ziren. Erraztasunak aprobetxatu zituzten txapeldunek.
Lizeagak ez zuen lortu Irazustabarrena menperatzea eta pelota gehiegi utzi zuen aurrelariaren aukeran. Intxurreko atzelariak kantxa asko kubritu zuen eta Urbietak errematatzeko aukera ia denak aprobetxatu zituen tantoak amaitzeko, Arrieta ezezagun baten aurrean. Ez zuen egunik hoberena izan aurrelariak.
Hernaniarren hirugarren finala izan da aurten Arrietak eta Lizeagak Egian jokatu dutena. y