Dominarekin bueltatuko dira, ziur, bailarako bi ordezkariak, trinketeko Munduko Kopatik. Finalean izango da gaur Oier Gurutzealde astigartarra, Eneko Maiz villabonarrarekin, eta urrezko domina bilatuko dute, eskuz banaka, Frantziako selekzioaren kontra. Eta Amaia Irazustabarrenak, atzo eskuratu zuen brontzezko domina: paleta gomaz binaka, atzo hirugarren posturako lehia irabazi zuen, Argentinaren kontra, berak jokatu ez zuen arren.
Bi lapurtar kontrario, gaur
Gaurko finalean, bi lapurtar izango dituzte aurrez aurre, Gurutzealdek eta Maizek: Battitta Ducassou itsasuarra, eta Mathieu Ospital baionarra.
Goizeko 11:30etan izango da hori, eta lehia gogorra espero da. Gurutzealdek eta Maizek, zein Ducassouk eta Ospitalek, jokatutako partidu guztiak irabazi dituzte. Ligaxkan, multzo bakoitzeko lider bukatu zuten, eta semifinalean, Kuba menderatu zuen Ospitalek, eta Mexiko Maizek: 15-6, 12-15 eta 10-4 nagusitu zitzaion villabonarra, David Alvarezi, desenpatean.
Ligaxkako lau partiduetatik, bi partidu jokatu ditu Gurutzealdek, eta biak irabazi: 15-1 eta 15-3 Argentinari, eta 15-2 eta 15-4 Txileri. Erraz irabazi zituen bere bi partiduak, Maizek ere: 15-2 eta 15-2 nagusitu zen, hala Kubaren kontra, nola Estatu Batuaken kontra.
Brontzea azkenean, Amaia Irazustabarrenak
Atzo zeukan partidu erabakigarria, aldiz, Amaia Irazustabarrenak. Frantziaren kontra semifinala galdu ondoren, brontzea lortzeko partidua izan zuten atzo, Argentinaren kontra. Ez zuen jokatu hernaniarrak, baina garaipen ederra lortu zuten Ane Ibañez eta Nagore Martin selekziokideek, desenpateko azkeneko tantoan: 15-6, 11-15 eta 10-9.
Hain justu, argentinarren kontra zaildu zitzaien txapelketa, ligaxkan. Uruguay menderatzea lortu zuten aurrena, Irazustabarrenak eta Nagore Martinek (10-15, 15-12 eta 10-9); eta Estatu Batuaki erraz irabazi gero, beste bi selekziokideek (15-0 eta 15-0). Baina ligaxkako azkeneko partiduan, 7-15 eta 7-15 galdu zuten Argentinaren kontra, Irazustabarrenak eta Martinek; eta horrekin, Frantzia faboritoa zuten kontrario, semifinalean: 15-7 eta 15-11 galdu zuen hernaniarrak, Haizea Zamorarekin. Atzo eman zioten buelta.