Duela bi aste pasatxo egin zuten aurreneko tailerra Aranon, Dakienak ez dakienari erakutsi egitasmoaren barruan, Mendialdea Mankomunitateak antolatuta. Eta datorren ostegunean eginen dute bigarrena: berrerabiltze, berreskuratze nahiz zaharberritze tailer irekia. Maisuenean izanen da, arratsaldeko 18:00etatik 20:00etara.
Urriaren 10eko tailerrean, erosketa ohiturak aldatzeari buruz aritu ziren, eta landu zuten nola egin erosketak, zaborrik sortu gabe, eta zer egin daitekeen, egunerokoan zaborra ekiditeko. Oraingo honetan, berriz, saiatuko dira «aukera berri bat» ematen, «etxean hondakin izateko zorian daukagun zerbaiti: altzari txikiren bat, kartoizko, kristalezko edo plastikozko zerbait, oihal zatiren bat...», azaldu dute.
«Etxean hondakin izateko zorian daukagun zerbaiti, aukera berri bat ematen saiatuko gara»
Horretarako, elkarri lagunduko diote, eta bakoitzak duen ezagutza, besteekin konpartitu.
Azaroaren 8an, Goizuetan
Aranon bezala, Goizuetan ere jarri du martxan egitasmoa, Mendialdea Mankomunitateak; eta aurreneko tailerra egina dute dagoeneko, han ere. Urriaren 11n izan zen hori, Aranoko saioaren hurrengo egunean.
Bigarrena, berriz, astebete beranduago eginen dute, Goizuetako eskolako jangelan. Azaroaren 8an jarri dute hitzordua, ostiralarekin; arratsaldeko 18:00etatik 20:00etara.
Gaia, berbera izanen da: etxeko hondakinak berrerabili, berreskuratu eta zaharberritzea landuko dute.