Sari potoloa eskuratu berri du Leitza, Areso, Goizueta eta Aranoko Oinarrizko Gizarte Zerbitzuen Mankomunitateak: Nafarroako Gizarte Zerbitzuen Kalitatearen XII. Saria irabazi du, Nafarroako Butantxo, Zaintzeen Herria esperientziagatik.
«Butan herrialdeko bizitza-filosofian dago oinarrituta proiektua, eta 2016tik gaur egun arte, Goizuetan eta Aranon ari da garatzen. «Auzokideen arteko tratu onak bultzatzea» du helburu, eta baita pertsonen arteko harremanak sendotzea eta estutzea ere. Praktika hori berritzailetzat jo du epaimahaiak. Baloratu du bere «originaltasuna eta berezitasuna», eta «Nafarroako beste herri batzuetara zabaldu daitekeen ekimena» dela nabarmendu du.
Proiektuaren beste hainbat ezaugarri ere goraipatu dituzte epaimahaikideek: herritar guztientzako proiektua izatea, belaunaldien artekoa, diziplina artekoa eta anitzekoa, pertsonak eta komunitatea ahalduntzea, eta autogobernuaren ildoan lan egitea. Eta azkenik, nabarmendu du prebentziorako tresna dela, «esku hartzeko eta kaltea konpontzeko fasearen aurrekoa».
Asiako herrialdeekin «antzekotasunak», Aranok eta Goizuetak
Himalaya mendilerroan dagoen herrialdea da Butan, Tibet eta Indiaren artean kokatua. Eta Gizarte Zerbitzuen Mankomunitateak azaldu du, «antzekotasunak» aurkitu zituztela, Goizueta eta Arano eta Asiako herrialdeen artean: sakabanaketa, nortasun propioa, bizilagunen arteko harremanen kalitatea edota auzolana.
«Butanen bezala, Barne Produktu Gordinaren ordez, ongizatea neurtzen duten beste osagai batzuk balioan jarri eta indartu nahi izan ditugu; hala nola, zaintza lanak, denboraren erabilera, naturak suposatzen duen kapitala, ingurumenaren kalitatea, alderdi sozioekonomikoa eta kapital soziala», azaldu dute.