Pleno egitetik gertu izan dira asteburu honetan, bailarako hiru saskibaloi talde nagusiak; baina azkenean, Mundarroko neskek eta Hernaniko mutilek soilik lortu dute garaipena: gutxigatik galdu zuten, Mundarroko mutilek. Etxean aritu ziren, mutilen bi taldeak.
Hernanik, Debasket talde debarra hartu zuen kiroldegian, eta 72-62 nagusitu zen. Hasieratik egin zuten tartea: 16-9 aurreratu ziren aurreneko laurdenean, eta 36-25 haunditu zuten tartea, atsedenaldirako. Primeran eutsi zioten tarteari, bigarren zati osoan.
Mundarrok, berriz, porrota jaso zuen, Internacional donostiarraren kontra. Ondo hasi ziren astigartarrak, 20-17 aurreratuta; eta 31-31 berdinduta iritsi ziren atsedenaldira. Baina hirugarren laurdenean, sei punturen aldea lortu zuten donostiarrek (51-57), eta azkenekoan garaipenaren lehian sartuta ere, ezin izan zioten buelta eman astigartarrek (74-77).
Etxean ez, Tolosan jokatu zuten Mundarroko neskek, Lila Takeren kontra; eta baita ondo jokatu ere. 18-12 hasi ziren galtzen, baina bigarren laurdenean 0-22 partziala eginda, ia erabakita utzi zuten partidua, atsedenaldirako (18-34). Atsedenetik bueltan, gerturatu egin ziren tolosarrak, baina eutsi zioten astigartarrek azkenean, garaipena ziurtatzeko (50-55).