Txapelketa ezberdinetan, dozenaka partidu jokatu dituzte asteburuan, pelotari hernaniar eta astigartarrek. Eta batzuek emaitza borobilak lortu badituzte, kaxkarragoak izan dira, beste batzuenak.
Frantziako Pauen dira egun hauetan, trinketeko Munduko Kopa lehiatzen, Amaia Irazustabarrena hernaniarra eta Oier Gurutzealde astigartarra. Baina hasiera ezberdina izan dute biek. Jokatutako hiruak irabazi dituzte Gurutzealdek eta Eneko Maiz selekziokideak, eskuz banaka: 15-2 eta 15-2 irabazi zion Maizek Kubari, larunbatean; 15-1 eta 15-3 nagusitu zitzaion Gurutzealde Argentinari, igandean; eta 15-2 eta 15-2 menderatu zuen Maizek atzo, Estatu Batuak. Txileren kontra daukate gaur, 12:00etan, ligaxkako azkenekoa; eta litekeena da Gurutzealdek jokatzea.
Irazustabarrenak, berriz, atzo ekin zion, Uruguayren kontra; eta Haizea Zamorarekin batera, buelta eman zion partiduari: 10-15, 15-12 eta 10-9 irabazi zuten. Estatu Batuak izango dute aurrez aurre, gaur 11:00etan.
Gipuzkoakoan, palaz primeran baina eskuz erdipurdi
Asteburu bete-betea izan dute berriro, Gipuzkoako Txapelketan. Eta borobila izan da, palisten kasuan: partidu guztiak irabazi dituzte hernaniarrek. Horrela, hurrengo fasera pasea ziurtatu dute Endika Ramosek, Xabier Legarretak, Aiheko Zubimendik eta Eneko Lujanbiok, mutilen bigarren mailan; eta Mikel Manterolak, Ander Arandiak eta Iker Zurutuzak, hirugarren mailan. Ligaxkako aurreneko postuan daude, gainera, Ariane Arrieta eta Maider Huizi, lehenengo mailan; eta Ekhine Balerdi eta Garazi Urdangarin, bigarrenean.
Ganix Urdangarin eta Beñat Zubiarrain astigartarrek, berriz, galdu egin zuten.
Ez dira hain onak izan emaitzak, esku pelotarien artean. 19 partidu jokatu, eta bederatzi irabazi dituzte, hernaniar eta astigartarrek. Garaipen garrantzitsuak lortu dituzte: Hodei Exposito astigartarrak eta Markel Lizeaga hernaniarrak, semifinaletara sailkatzeko; Harri Loidi eta Jokin Santxez astigartarrek, multzoko buru izateko; eta Anartz Oiartzabal eta Oinatz Insausti jubenil hernaniarrek, galdu gabe jarraitzeko.
Maria Granadok garaipena, Lau t’erdiko Txapelketan
Garaipen garrantzitsua lortu du Maria Granado hernaniarrak ere: larunbatean hasi zuen Lau t’erdiko Emakume Master Cup Txapelketa, eta erraz nagusitu zitzaion Maialen Ganzaraini (18-3), bi eskuekin oso indartsu eta seguru arituta.