Martxan jarri da Sagarberritu proiektua, Beterri-Buruntza eskualdean. 2018an egindako azterketa dauka oinarri: eskualdeko 40 sagardotegitan erabili eta berrerabiltzen diren beirazko botilen datuak bildu ziren, eta ondorioztatu zen sagardo botilen berrerabilpena indartzeko aukera badagoela, «ekonomia zirkularra aktibatuz».
Tokiko Garapenerako zerbitzuak sustatu du proiektua, Foru Aldundiko Ingurumen sailak diruz lagunduta, eta Gipuzkoako Sagardo Elkarteak, Euskal Sagardoa entitateak eta San Marko Mankomunitateak babestuta.
401.673 botila gehiago berrerabiltzeko erronka
2018an bildutako datuen arabera, Beterri-Buruntzan ekoizten diren botilak 1.842.553 dira, eta horietatik %78 berrerabiltzen diren arren, 401.673 botila, hau da, %22 berrerabilpen ziklotik kanpo geratzen dira. Proiektu honekin, beraz, hori berrerabilpen zirkuituan sartzea lortu nahi da.
Hiru ardatzeko proiektua da sustatu dena: helburu soziala, ingurumenari lotutakoa eta ekonomikoa ditu.
Kontsumoak murriztu eta lanpostuak sortu
«Proiektu honekin lortu nahi dena da ekonomia zirkularrean oinarrituta, sagardo-sektoreko botilak jaso, garbitu eta berrerabiltzeko sistema jasangarri baten bideragarritasuna erakustea».
Herritarrek Garbiguneetara eraman ditzakete botilak, sagardotegira bueltatzeaz gain.
Botila bakoitzaren iraupena luzatu nahi da, eta horrela egiten du bat proiektuak, ekonomia zirkularrarekin, «garapen iraunkorrean, eta produktu, zerbitzu, hondakin, material, ur eta energiaren bizi zikloa ixtean oinarritzen» baita.
Era berean, helburu sozial nabarmena du, sagardo botilen bilketarako lanpostu berriak sortuko direlako, Sartu-Erroak enpresaren eta Beterri-Buruntzako Udalen lan hitzarmenaren bitartez. «Irabazi asmorik gabeko sozietatea da eta pertsonen orientazioa, formazioa eta laneratzea sustatzea du helburu».
Herritarrek ere, zeregina
Botila Sagarberritu, berrerabilpenerako zirkuituan sartzeko, herritarrek ere badute ardura. Horrela, orain arte bezala botilak sagardotegietara bueltatzeaz gain, San Marko Mankomunitateko Garbiguneetara ere eraman ahal izango dituzte, zerbitzu berezia jarriko baitu horretarako.