Gaur hasiko da, Pauen, trinketeko Munduko Kopa; eta bertan izango dira, Urumea bailarako bi pelotari: paleta gomaz binaka ariko da Amaia Irazustabarrena hernaniarra; eta eskuz banaka Oier Gurutzealde astigartarra. Urriaren 26an bukatuko da txapelketa.
Gaur bertan egingo du debuta Gurutzealdek, Kubaren kontra, iluntzeko 20:00etan; eta astelehenean ekingo dio Irazustabarrenak, Uruguayren kontra, goizeko 11:00etan. Ligaxka izango dute aurrena: B multzoan ariko da Gurutzealde, Argentina, Kuba, Estatu Batuak eta Txilerekin; eta B multzoan Irazustabarrena ere, Argentina, Estatu Batuak eta Uruguayrekin.
20 partidu, gaur eta bihar
Bertako txapelketetan, berriz, 20 partidu jokatuko dituzte asteburu honetan, bailarako pelotariek. Hernanin, gaur arratsaldean izango da aurreneko jaialdia, 16:00etan hasita, palako bi eta eskuzko hiru partidurekin; eta bihar goizean bigarrena, 11:00etan hasita, palako eta eskuzko bina partidurekin. Astigarragan, berriz, gaur 10:30etan izango da partidu bakarra, palakoa. Bestalde, aste honetan hasi da Gipuzkoako Errendimendu Txapelketa, alebin eta infantil mailetan.