Makina bat partidu jokatuko dituzte asteburu honetan ere, bailarako futbol taldeek. Eta talde nagusien artean, mutilen biak ariko dira etxean, gaur arratsaldean. Biak ere, garaipenaren bidera bueltatzeko asmoz, aurreko asteburuan galdu ondoren.
16:00etan hasiko da Mundarroko erregional preferenteen partidua, Zarkumendegin; eta Santo Tomas Lizeoa hartuko dute moreek. Hernaniko ohorezko erregionalek, berriz, ordu erdi beranduago daukate zita, 16:30etan Zubipen; eta Zarautz hartuko dute haiek. Sailkapenaren erdi partean daude, bien kontrarioak.
Kanpoan ariko dira, aldiz, Hernaniko Euskal Ligako neskak, eta Liga Nazionaleko mutil jubenilak. Eibarren ariko dira neskak bihar, 11:00etan Unben, Eibarren kontra. Bigarren sailkatua da talde eibartarra, baina bolada ona daramakite txuri-berdeek, eta punturen bat ekartzeko gogoz joango dira.
Mutil jubenilak, berriz, Gernikan ariko dira, bihar arratsaldeko 18:15etan. Kontrario gogorra izango da Gernika.