Kataluniako Proceseko epaia jakin bezain laster, mobilizazioak deitu zituen atzo Gure Esku Dago mugimenduak, herriz herri. Urumea bailaran hiru egin ziren: Astigarragan, Hernanin eta Goizuetan. Denetan, zarata ateratzea izan zuten helburu, Madrilen ozen entzun zezaten herritarren iritzia. Lelo bera erabili zuten guztiek: Erreferenduma ez da delitua. 9 eta 13 urte arteko espetxe zigorrak Epaiaren berri atzo goizean jakinarazi zuen Espainiako Auzitegi Gorenak. 2017ko urriaren 1eko erreferendumarengatik 9 eta 13 urte arteko espetxe zigorrak ezarri dizkiete dagoeneko espetxean dauden Kataluniako bederatzi buruzagi sozial eta politiko subiranistei. Oriol Junquerasi, 13 urteko zigorra ezarri zaio, sedizioa eta diru publikoaren erabilera bidegabea egotzita. Raül Romevari, 12 urte, arrazoi beragatik. Dolors Bassari eta Jordi Turulli ere, beste 12na urte bakoitzari, arrazoi beragatik, baita ere. Carme Forcadelli, 11 urte eta erdi, kasu honetan, sedizioagatik. Eta gainontzekoei ere sedizioa egotzi zaie, eta 10 urte eta erdiko espetxe zigorra ezarri zaie Joaquim Forni eta Josep Rulli; eta 9na urtekoa, Jordi Sànchezi eta Jordi Cuixati. Horrez gain, urtebete eta zortzi hilabeteko inhabilitazioak ezarri dizkiete Santi Vila, Carles Mundo eta Meritxell Borrasi. Hauei egotzitako delitua desobedientzia da. Gainera, Carles Puigdemont Kataluniako presidente ohia Espainiaratzeko euroagindua jarri du berriro martxan Pablo Llarena, Auzitegi Goreneko epaile instruktoreak. Matxinadarik ez Sententziak, azkenean, matxinada delitua baztertu du. 2017an «indarkeriazko gertakariak» izan zirela badio ere, matxinada delituagatik zigortzeko «nahikoa froga ez direla» zehaztu du. Erantzun bateratua emateko deia, larunbaterako Atzoko protestak lehendik deituta zituen Gure Esku Dagok. Izan ere, epaia zein izango zen susmoa hartuta, sententzia argitaratzen zen egunerako protestetarako hitzorduak ezarri zituen. Horien ondoren, beste mobilizazio baterako deia ere egin du. Hain zuzen, «erantzun bateratua» emateko, larunbatean Donostian manifestazio erraldoi bat egiteko deia zabaldu du. Dena den, oraindik ez du xehetasun gehiago eman. Bestalde, gehiengo sindikalak ere kontzentrazioak deitu ditu enpresetan, ostiralean, eta deialdi gehiago sortzen ari dira hainbat eragile.