Ekitaldi berezia izan zuen Mitxelena Kooperatibak, joan den larunbatean: aitortza egin zien, «gaur egun kooperatiba denaren 60 urtetik gorako ibilbidean, sortzaile eta partaide izan direnei, eta beraien familiei, bereziki emazteei». Alegia, Mitxelena Kooperatiba «sortzen, hazten eta sendotzen» aritu diren partaide guztiak omendu zituzten. Ekitaldira gonbidatu zituzten, erretiratutako langileak, «gehienak kooperatibarako aldaketa egin zutenak»; hornitzaileak, bezeroak, zenbait instituziotako ordezkariak, eta Hernaniko eta Buruntzaldeako gizarte eta kultura arloetako hainbat lagun.
Instalazioak eta makineria erakutsi zizkieten bertaratuei, eta Mitxelenaren balioak erakusten dituen bideo bat jarri, Hernaniko emakumeen traineruaren hariari segika: «izan ere, arraunlariek ere aurrera egiten dute, atzean uzten duten horri begira». Gainera, emakumeen presentzia nabarmendu zuten: langile askoren emazte eta bikotekideek ere «ixileko lan haundia» egin zutelako, «garai zailetan bereziki», eta baita kooperatiba «parekidetasunerako urrats sendoak» ematen ari delako ere.
Bukatzeko, langile erretiratuek eta haien emazteek osatutako soka-dantza egin zuten, eta Mitxelenaren historiari buruzko liburuxka eta bideoak banatu zizkieten. Mokadu batekin borobildu zuten, aitortza ekitaldia.