Hainbat ekintza antolatu ditu Hernaniko Udalak, Baliabideak batu, ez errefusatu kanpainaren barruan, hondakinen kudeaketa hobetzeko. Eta horien artean lehenengoa izan zen, aurreko ostiralean Tilosetan egin zuten karakteriazio publikoa: errefusera botatako 90,81 kilo hondakin bildu zituzten, eta erakutsi zuten, horretatik zenbat zen benetan errefusa eta zenbat sailkatzeko modukoa.
Lortutako emaitzak eman ditu Udalak: %10,25a besterik ez zen errefusa, eta ia %90a, «sailkatzeko modukoa». Erdia baino gehiago (%50,85) materia organikoa zen, %14,62 ontzi arinak, %7,79 papera eta kartoia, %6,23 beira, eta %5,47 arropa, besteak beste.
Horren aurrean, Udalak jakinarazi du, 18,8 euro kostatzen zaiola 100 kilo errefus tratatzea; eta aldiz, «karakterizazioan azaldutako hondakinak ondo sailkatuta», 6 euro inguru. «Ondorioz, herriak 12 euro galdu ditu, hondakin guzti horiek errefusa balira bezala jasota», azpimarratu du.
Informazioa puntua, Zinkoenean eta Plaza Berrin
Urrian zehar, berriz, hondakinei buruzko informazio puntua jarriko dute, auzoz auzo. Gaur eta bihar, Zinkoenean egongo da goizean (09:30-11:30), eta Plaza Berrin arratsaldean (16:00-20:00); ostegun eta ostiralean, Txantxillan goizez eta Ereñotzun arratsaldez.