Bigarren hitzordua izango du bihar arratsaldean, Hitz-Andana jaialdiak. Eta oraingoan, kalejira musikatua egingo dute, 19:00etan Biteritik abiatuta. Manez eta Kobreak taldeak jarriko du musika, ibilbide osoan zehar; eta Ainara Ortega hernaniarrak, istorioen ahotsa.
Izan ere, herriko zazpi edo zortzi txoko aukeratu dituzte, kalejiraren geldialdiak egiteko; eta horietan, Thierry Biscary Manez abeslariaren taldearen kantuez gozatzeaz gain, txoko bakoitzeko istorioak ezagutzeko aukera izango dute, bertaratuek. Ortegak berak kontatuko ditu, horiek.
Ipuinak eta antzerkia, etzi
Etzitik larunbatera bitarte ere, izango dira ekintzak, jaialdiaren barruan. Bi hitzordu jarri dituzte, etzirako: ipuin kontaketa batetik, Maite Arreseren eskutik, 5 urtetik gorakoentzat (aldaketa izan da adin tartean), 17:30etan Biterin; eta Martuteneko kartzelan irakurraldi dramatizatua bestetik, Bernardo Atxaga eta Jose Kruz Gurrutxagarekin, 20:00etan Biterin. Bertan jasotzen ditu Atxagak, Martuteneko kartzelan izandako bizipenak, duela zenbait urte, euskal literatura zaharrari buruzko hitzaldia eskaini zuenean.
Liburutegian eskatu daitezke, saiorako gonbidapenak.