Plenoak onartutako 2020rako zerga ordenantzaren kontra azaldu da Hernaniko?EAJ-PNV ere: «nahiz eta gure proposamen batzuk txertatu diren, berriro igoko dira zerga batzuk, %0,8 batazbeste. Eta ezinezkoa zaigu igoera daukan edozein zerga ordenantza babestea, urtero urtero altxortegian 3,5 milioi euro inguruko gerakina daukagunean».
Eta gaineratu du: «joan den urtean, azkeneko urteotan pilatutako gerakina 14 milioi eurora iritsi zen». Horregatik, galdera luzatu dio EH Bilduren udal gobernuari: «zertarako igo zerga batzuk, gero ez badugu diru publikoa gastatzen?», salatu du alderdi jeltzaleak.
«Zergak %20 igo dira Hernanin, ezker abertzaleak gobernatzen duenetik»
Andoni Amonarraizek, Hernaniko EAJ-PNVren bozeramaileak, azpimarratu du: «ezker abertzaleak, ANVk eta Bilduk gobernatzen duenetik, zergak %20 igo zaizkie hernaniarrei». Horregatik, beste bi galdera luzatu ditu: «ANVk 2007an gobernatu zuenetik, hernaniarren soldatak %20 igo dira? EH Bilduk %20 haunditu du zerbitzu kopurua edo %20 hobetu ditu zeudenak? Herritarrek erantzun dezatela».
Zergak igotzeko erabakiaren aurrean, lanean jarraituko dutela nabarmendu du Amonarraizek: «lanean jarraitzen dugu eta hala jarraituko dugu, ikuspegi positibo batetik, eta hernaniarren bizi kalitatea hobetzera bideratutako proposamenak eginez».