Berdintasun arloko bi hitzordu jarri ditu Astigarragako Udalak etzi, ostegunarekin.
Batetik, saio irekia egingo dute, Emakumeen eta Gizonen Berdintasunerako III. Plana diseinatzeko. Udaletxeko pleno aretoan izango da, arratsaldeko 15:00etan hasita; eta prozesuan parte hartzera gonbidatu dituzte herritar guztiak.
«Dakizuen bezala, azkeneko hilabeteotan, Astigarragako Berdintasunerako II. Plana amaitu zenez geroztik, prozesua eraman dugu aurrera, horren ebaluazioa egiteko eta udalerriaren egoeraren diagnostikoa berritzeko. Berdintasun Sailetik bideratu dugu, Elhuyar Aholkularitzarekin elkarlanean, eta Emakunderen babesarekin», gogorarazi du Udalak.
Uztailean itxi zuen prozesu hori, herritarren proposamenak bilduz; eta orain, «iritsi da momentua prozesua borobildu, eta ikusitako guztiarekin plan berri bat diseinatzeko, urte berriarekin martxan hasiko dena», aurreratu du.
Horretarako, nabarmendu du «ezinbestekoa» izango dela herritarren partehartzea, «hurrengo lau urteetarako lan-ildo eta ekintza garrantzitsuenak, denon artean adostu eta aurrera ateratzeko. Zer nahi dugu? Noiz nahi dugu? Zer proposatzen du Berdintasun Sailak hurrengo urteetarako?». Galdera horiei erantzuten saiatuko dira, etziko saioan.
?Tratu on txinpartak? tailerra, Herri Eskolan
Eta Berdintasun Planari buruzko saioaren ondoren, tailer bat izango da, familiako kide guztiek parte hartzeko: Tratu on txinpartak.
Astigarragako Herri Eskolako patioan egingo dute hori, arratsaldeko 16:30etan hasi eta 18:30ak arte. Eta helburua izango da, emakumeenganako indarkeriaren aurrean, tratu onak sustatu eta ikastea. Horretarako, baliatuko dituzte jolasak, ipuinak, kantuak edota marrazkiak, besteak beste.
«Etxeko txikienentzako txokoa izango da, eta adin guztietako jendearentzat dago irekita», luzatu dute gonbitea.