GIPUZKOAKO Bertsolari Txapelketako final-zortzirenak jokatuko dira gaur Zumarraga-Urretxuko Zelai Aristi Aretoan, 17:00etan. Biharko saioak aldiz, Elgoibarko Herri Antzokian izango du hitzordua ordu berean.
Saio bakoitzean sei bertsolari igoko dira oholtza gainera eta horietatik lau Bertso Eskolan ibilitakoak izango dira.
Eli Pagola Apezetxea eta Iker Ormazabal Ojeda arituko dira gaur Zumarraga-Urretxuko Zelai Aristi Aretoan, eta bihar Eñaut Martikorena Lizaso eta Unai Gaztelumendi Arandia, Elgoibarreko Herri Antzokiko saioan.
Bi saioetako irabazleak zuzenean sailkatuko dira final-laurdenetara eta gainontzeko bertsolariek puntuazioaren arabera izango dute sailkapen horretan leku bat egiteko aukera.
Horretarako egin beharreko lanak banaka eta binaka izango dira, zortziko handian zein zortziko txikian, eta kartzelako bertso bat ere izango da.
Azken sarrerak oraindik ere salgai
Saioetara joan nahi izanez gero sarrerak oraindik ere salgai daude webgune honetan: www.bertsosarrerak.eus. Eta aurrez agortzen ez badira, txarteldegian ere erosteko aukera izango da gaur eta bihar, arratsaldeko 16:00etatik aurrera.