Sekulako boleibol jaialdia biziko du gaur, Hernaniko kiroldegiak. Euskadiko Boleibol Kopa antolatu dute, eta goizeko 09:30etatik iluntzeko 20:00etara, atsedenik gabe, 32 partidu jokatuko dira. «Boleibol maratoia izango da, kiroldegian azkeneko urteotan jokatu den txapelketarik haundiena», nabarmendu dute Hernaniko Boleibol Taldetik.
Mutil seniorrek hartuko dute parte txapelketan, hernaniarren artean: «talde berria izanik, ikasi eta esperientzia hartzea izango da helburua».
Euskal Herriko jokalari onenak ikusteko aukera
Mutilen kasuan, 12 partidu jokatuko dira, eta zortzi taldek hartuko dute parte: Galdakao, Udaparen bi talde, Bera Beraren beste bi talde, Sestao eta Navarboley, Hernanirekin batera. Final laurdenetan ekingo diote, eta Navarboley talde nafarraren kontra jokatuko dute hernaniarrek, 10:30etan. «Ez da partidu erraza izango, baina ziur daukaten guztia utziko dutela kantxan. Garrantzitsua da ondo hastea». Galduz gero, 12:30etan izango dute bigarrena; baina irabazita, aldiz, 13:30etan semifinala. Arratsaldeko 17:30etan jokatuko da, mutilen finala.
Nesketan, berriz, 20 partidu jokatuko dituzte, 12 taldek eman baitute izena. Final zortzirenetan ekingo diote Marierrota Lekeitio, Fortuna B, Fortuna A, Jatorria, Sestao, Galdakao B, Aranbizkarra eta Navarboley taldeek, 09:30etan hasita; eta final laurdenetan sartuko dira Udapa, Haro, Logroño eta Galdakao A, 11:30etan. Haien kasuan, 14:30etan jokatuko dira semifinalak, eta arratsaldeko 18:30etan.
«Nesken txapelketak maila haundia izango du. Talde indartsuek eman dute izena; eta denen gainetik dago Sestao, zilarrezko ligako taldea, baina ezin ditugu ahaztu, Errioxako taldeak eta Navarboley. Mutilen artean, berriz, Bera Bera eta Galdakao dira faborito».
Aldi berean hiru partidu, lehenengo pistan
Kiroldegiko lehenengo pistan jokatuko dira partidu gehienak, eta aldi berean, hiru partidu izango dira ikusgai, uneoro. Bigarren pistan ere jokatuko dira hiru partidu, mutilenak, 09:30etatik 12:30etara.
«Ia egun osoan zehar, partidu bikainak ikusteko aukera izango dugu, eta kiroldegira animatu nahi ditugu hernaniar guztiak, ikuskizun ederraz goza dezaten haien seme-alabekin. Ziur gaude, afizioa sortzeko aukera ezin hobea dela».
Sarrera doakoa da. Errifak salduko dituzte, urdaiazpiko baten zozketarako, taldearentzat dirua biltzeko.