Martxan da Gipuzkoako txapelketa, Hernaniko eta Mundarroko zenbait eskubaloi talderentzat. Aurreko astean ekin zioten ligari, bi herrietako neska zein mutil jubenilek, eta kadete mailakoek.
Eta asteburu honetan, horietako hiruk jokatuko dute. Etxean ariko dira hiruak, gainera, denboraldi honetan aurreneko aldiz. Gaur daukate partidua, Mundarroko neska jubenilek: Ordiziaren kontra jokatuko dute, arratsaldeko 17:00etan hasita, kiroldegian.
Hernaniko mutil kadete eta jubenilek, berriz, bihar daukate hitzordua, kiroldegian. Egiaren kontra ariko dira jubenilak, aurrena, 10:15etan; eta Zarautz izango dute aurrean kadeteek, ondoren, 12:00etan.
Hernaniko lau taldek, lagunartekoa gaur Egian
Hernaniko beste lau taldek, berriz, lagunarteko partiduak jokatuko dituzte gaur, denboraldia prestatzen jarraitzeko. Guztiak ariko dira Egian, bertako taldearen kontra: mutil infantilen bi taldeak 09:30etan eta 10:30etan; neska infantilen taldea 11:30etan; eta neska kadeteak 12:30etan.