Hilean behin, aurreneko asteartero, biltzen da Gizon Taldea Goizuetan, bakardadeari nola aurre egin lantzeko, konpartitzeko eta harreman sarea sendotzeko. Etzidamu dute hurrengo hitzordua, ohi bezala, goizeko 10:30etatik 12:00etara, Umore Ona elkartean.
Seigarren saioa izanen da, maiatzaren 7an ekin baitzioten, Gizarte Zerbitzuen eta Goizuetako Udalaren eskutik. Kafe eta pasta batzuen inguruan elkartu, eta aritzen dira normalean hitz egiten ez dituzten gauzetaz. «Nahi duenak bere kontuak konpartitzen ditu, jakinda errespetuz entzun eta hitz egin beharko diogula elkarri, epairik egin gabe», azaldu dute antolatzaileek.
Nabarmendu dute, «denon arteko harreman sarea sendotzen» ari direla, eta «oso momentu politak» konpartitu dituztela, hilabete hauetan.
Saioetan partehartzea irekia da, nahi duena azaldu daiteke: «momentuz bederatzi partehartzaile dira; gehienak, aurreko tailerrean izandakoak».
2017ko tailerrari, segida
Izan ere, Gizon Taldeak badu aurrekaririk: 2017an gizon tailerra jarri zuten martxan Gizarte Zerbitzuek, bakarrik bizi edo egoera ahulean egon zitezkeen gizonezkoei bideratuta. 10 saio egin zituzten orduan, udaletxean, bakardadeari aurre egiteko tresna batzuk garatzeko.
Horrekin lortu zuten, herriko gizonen arteko harremanak sendotzeaz gain, gaia lantzeko gune edo espazioa sortzea. Ohitura osasuntsuak eta emozioak landu zituzten bertan.
Lanketa horri segida eman nahi izan diote aurten, Gizon Taldearekin. «Umore Ona elkartea ezin hobea iruditu zaigu horretarako: sarrera erraza eta zuzena dauka, traba arkitektonikorik gabea, mahai eta aulkiak dauzka, eta kafetxo bat edo hartzeko aukera», diote.
«Nahi duenak konpartitzen ditu bere kontuak, jakinda errespetuz entzun eta hitz egin beharko diogula elkarri, epairik egin gabe»
Beharrak, irisgarritasun arazoak eta bakardadea, landutako gaien artean
Saio bakoitzari, erronda batekin ematen diote hasiera, bakoitzak azaldu dezan nola dagoen, «errespetatuz hitz egiteko edo konpartitzeko daukan gogoa eta erritmoa». Eta ondoren, gai bati heltzen diote.
Aurreneko bi saioetan, landu zituzten haiek dauzkaten beharrak, eta horiek asetzeko herrian dauzkaten instalazio, elkarte eta zerbitzu ezberdinak. Eta era berean, horietara iristeko dauzkaten oztopoak jarri zituzten mahai gainean:?«konturatu ginen, oinarrizko zerbitzu batzuek, irisgarritasun arazoak dituztela. Udaletxeak, korreoak, tabernak edota farmaziak, besteak beste». Hori «erraz hobetzeko», proposamen zerrenda bat ere osatu zuten, saioetako batean: Maleneko zubia hobetu; San Anton aldean kotxeen abiadura jaisteko zerbait jarri, pasiatzen ari direnen arriskua gutxitzeko; eta herriko gimnasioan aparatu mota gehiago jarri.
Beste bi saiotan, bakardadearen gaia aztertu zuten; eta bakoitzarena neurtu zuten, galdetegi baten bitartez. «Ondoren, emaitzak baloratu eta komentatu ditugu», azaldu dute.
Edozein gai proposatu nahi duenak, badauka horretarako aukera. Interesa duten gizon guztiek, asteartean dute zita.