Getxok eta Gernikak maila galdu eta gero Ohorezko Mailan jokatzen den euskal derbi bakarra Ampo Ordizia eta Hernaniren artekoa da eta aurten bien arteko lehenengoa bihar jokatuko da, Ordiziako Altamira zelaian, 12:00etatik aurrera. Beraz, azken urteetan jokatuko den derbirik goiztiarrena da.
Bi taldeek helburu desberdinak dituzte eta orain arte jokatutako bi jardunaldietan emaitza desberdinak lortu dituzte. Hernanik bi partiduak galdu ditu (Ciencias eta Complutense Cisneros), eta Ampo Ordiziak estreinakoa irabazi (Burgos) eta aurreko asteburuan Alcobendasen galdu egin zuen.
Honela, Hernani puntu bakarrarekin iritsiko da derbira eta Ordizia seirekin. Goierritarrak dira faborito eta gehiago etxean jokatuta. Hernanik zaila izango du Altamiran punturen bat lortzea.
Hala ere, hernaniarrak saiatuko dira eta hori izango da helburu nagusia bere entrenatzaile Polidorik esan bezala. «Puntua lortzea ederra izango litzateke guretzat. Ordiziak pasa den urteko talde berdina du hiru-lau jokalari berrirekin. Blokea egina du eta oso talde indartsua da. Jokatu dituen bi partiduak ikusi ditut eta oso ongi daude».
Polidorik ordiziarrak ongi ikusten ditu postu guztietan eta jokalariak sasoiko daudela dio. «Beraien zutabea sendo dago. Unai Lasa lehenengo lerroan, bosta, Oier Goia hirugarren lerroan indartsu eta forma ezin hobean iritsi da Liga hasierara, bederatzia eta hamarra, bi argentinarrak, jokalari ausartak eta oso onak dira...».
«Gazteek aurrera pausoa eman behar dute eta irakasle lanetan nabil»
Nahiz eta oraindik irailean egon derbiak beti dira bereziak eta oraingoa ere horrela izango dela pentsatzen du entrenatzaile hernaniarrak. «Jokalarientzako eta taldearentzako beti da berezia Ordiziaren aurka lehiatzea».
Gainera taldeak izan dituen aldaketen ondorioz askorentzat lehenengo derbia izango da Ohorezko Mailan. «Erdiarentzako baino gehiago. Horrek urduritasuna sortzen die, antsietate pixka bat, baita gogo haundiak ere. Baina nik mezua helarazi nahi diet ezin dugula pentsatu hau denik gure partidua. Ordizia beste maila batean dago eta ezin duguna da jokalariak galdu kolpatuta. Ez dugu helburu berdinengatik borrokatzen. Nik uste pasa den urtekoa gutxienez errepikatzeko taldea badutela. Lehendabiziko lau postuetan geratzeko borrokan ibiliko dira».
«Blokea mantendu du Ordiziak eta lau jokalari berri dituzte. Lau talde hoberenen artean egoteko taldea du»
Polidori jakitun da aurtengo denboraldia oraindik ere zailagoa izango dela taldeak dituen bajen ondorioz. «Aurten horrek erronka haunditzen du, bi metro eta 125 kilo ditu aurrean dugun gainditu beharreko helburuak. Aurreko urteetan taldeak jokatzeko era bat zuen eta denek ezagutzen zuten. Entrenamenduetan lan taktikoa egin behar zen bakarrik jokomoldea ezaguna zelako. Orain berriz irakasle lanetan, erakusle lanetan gehiago aritu behar dut».
Azken partiduan bajak gehitu ziren; Etxeberria min hartuta egon zen eta Ordizian ere ez da egongo. Jon Otxotorena bueltako da baina «oraindik ez dago fisikoki ongi».
Gazteek aurrera pauso bat eman behar dutela pentsatzen du Polidorik, eta erronka polit baten aurrean dagoela taldea. «Urtean zehar nola hazten joango den ikusiko da», nabarmendu du. Maila honetan talde txikirik ez dago, eta beharrezkoa izango da, mailari eutsi nahi bazaio.