Julen Lizeaga astigartarra izango da aurten protagonista nagusienetako bat Sagar Uzta Festaren 19garren edizioan. Sagardotarako sagarraren alde egindako lanagatik aipamen berezia egingo zaio bihar topa herrikoia 13:00etan egin baino zerbait lehenago. Aurtengo festaren berrikuntza nabariena da Lizeagari egingo zaion omenaldia.
Sagar Bira mendi bueltarekin, gaur, Santiomendiko Sagardo Bidean zehar ekingo zaie ospakizunei. Eta ekitaldiaren ospakizun nagusia bihar izango da. Unean bertan egindako 2019 uztako lehen muztioa dastatzeko aukera izango da, baita sagardogileen aurreneko muztioaz gozatzeko aukera ere. Argazki Rally Digitala, sagar mermelada tailerra, eta muztioaren elaborazioan parte hartuko dute familiek goizean zehar eta arratsaldean amaituko da jaia Euskal Herriko aizkolari Gazteen txapelketarekin eta afizionatuen pelota partiduarekin. Astigartarrak ariko dira bertan jokoan.
SAGAR UZTA FESTA
IRAILAK 28, gaur09:30, Sagar Bira: Santiomendiko Sagardo Bidean zehar mendi buelta, familian.
12:30, Dastatze gidatuak tabernaz taberna Mikel Garaizabalekin.
20:00, Euskal Herriko V. Sagardo Txapelketa Herrikoiaren finala, Ergobin.
IRAILAK 29, bihar
Sagarraren Jaia, Foru Plazan
09:30, Txirrisklako txistularien diana.
10:30-12:00, XII. Sagar Uzta Argazki Rally Digitalean izenematea, plazan.
11:00-14:00, Sagarraren azoka: sagar mermelada tailerra; sagarren erakusketa, dastaketa eta salmenta; sagardo eta muztio dastaketa; saski, txertaketa eta abarren erakustaldiak; herriko baserritarren produktuen salmenta; eta trikitilariak herrian zehar.
11:00, Muztioaren elaborazioa: sagar biltzea, jotzea, eta zanpatzea, bertaratutako familien laguntzarekin.
12:30, Sagar dantza eta kirikoketa.
13:00, Txalaparta, eta 2019 uztako lehen muztioaren topa herrikoia. Julen Lizeagari aipamen berezia
14:30, Herri bazkaria.
16:30, Euskal Herriko aizkolari gazteen txapelketa.
17:15, Afizionatuen pelota partidua.