Ikasturteko aurreneko plenoa izan zuten herenegun Hernaniko udal ordezkariek. Eta 2020ra begira herritarrentzat garrantzitsua den erabakia hartu zuten: zein izango den 2020ko ordenantza fiskala.
Gai-ordeneko laugarren puntuan hartu zuten erabaki hori; aurretik, ekaineko eta uztaileko aktak onartu zituzten, baita azken hilabeteetako dekretuen eta kontu-hartzailearen txosten baten berri eman ere.
Santa Barbara bailara 63 zenbakiko eraikinaren xehetasun azterlana eta Zerbitzu Sozialetako CCOO sindikatuak plantilla aldaketaren aurka aurkeztutako idatziari erantzunez, gaiari dagokion dokumentazioa ematea aho batez onartu zuten.
%0,8ko igoera orokorra, 2020eko zerga eta tasek
Ezustekorik gabe, EH Bilduren udal gobernuak -gehiengo osoa daukate- egindako proposamena onartu zuten, haien botoekin. EAJ eta PSE-EEk kontra bozkatu zuten, eta abstenitu egin zen Elkarrekin Podemos.
Isa Sanchez ogasun zinegotziak azaldu zuen proposamena: «udal gobernuaren proposamenean, igoera orokorra %0,8koa izango da, hau da, KPI akumulatua borobilduta aplikatuko da (Eustatek 2018ko uztailetik 2019ko uztailera argitaratzen duena kontuan hartuta)».
Ordenantza fiskalak onartzeko egindako lanketa «eskertu» zuen Elkarrekin Podemosek.
Sanchezek azaldu zuenez, hainbat zerga eta tasa ez dira igoko. Zergen artean: IBI industriala, IAE eta ICIO, foru arauak markatzen duen gehiengoan daudelako; ezta gainbalioaren tipoa ere.
Tasen artean, aldiz, mantenduko dira: merkataritza, kultura eta zerbitzu sozialekin lotutako tasak.
Familia batek zenbateko igoera jasango duen irudikatu nahi izan zuen, hiru adibiderekin: «etxeko uraren tasa zentimo bat igotzen da; hondakinaren tasa 20 zentimo igotzen da hiruhilabetekoaren erreziboan; eta kiroldegiko abono familiarra 1,85 euro igotzen da».
Dena den, diru-laguntzak eta onura fiskalak mantendu egingo direla adierazi zuen.
Bukatzeko, hainbat aldaketen berri ere eman zuen. Aldaketa horiek hilerriaren tasetan, obrak egiteko lizentzietan eta ibilgailuaren zergaren hobarietan izango dira.
Metodologia «ederra»
Azalpenaren aurretik, Xabier Lertxundi alkateak ordenantza fiskala ezartzeko egindako lana azaldu zuen:?«uztailean alderdi guztiekin jarri ginen harremanetan gai hau lantzeko, eta gaur aurkezten dugun proposamenean alderdien proposamenak ere sartu ditugu».
Hain zuzen, egindako lanketa «eskertu» egin zion Elkarrekin Podemoseko Jaione Aristregik, eta ildo beretik, metodologia «ederra» izan zela adierazi zion EAJ-PNVko Andoni Amonarraizek. Eta eskatu zen «beste gaietara ere zabaltzeko».
Nafarroako herriei, elkartasuna
Horren guztiaren ondoren, mozioen txanda iritsi zen. EH Bilduk aurkeztutako Nafarroako erdialdeko uholde larrien aurrean akordioaren mozioa eztabaidatu zuten. Aho batez onartu zuten, besteak beste, Nafarroako herri horiei, laguntza moduan, 3.000 euroko ekarpena egitea, eta elkartasuna adieraztea.
Ondoren, klima aldaketari lotutako beste hiru jarri zituzten mahai gainean: EAJ-PNVren Hernanin plastikoaren erabilera murrizteko mozioa, Elkarrekin Podemosek aurkeztutako Hernanin larrialdi klimatikoa deklaratzeko eta krisiari aurre egiteko neurri zehatzak hartzeko mozioa; eta EH Bilduren Klima aldaketaren aurka konpromisoak hartzeko mozioa. Elkarrekin Podemos eta EH?Bildurenak onartu ziren; EAJ-PNVrena, aldiz, ez.
Aurkeztutako mozioak: