Oso hasiera ezberdina eman diote denboraldi berriari, mutilen Gipuzkoako 1go mailan, Hernanik eta Mundarrok. Aurrenekoek bi partidutik biak irabazi badituzte, astigartarrek garaipenik lortu gabe jarraitzen dute.
Donostiako Paco Yoldi kiroldegian lortu zuen bigarren garaipen hori, Hernanik. Askatuak taldeari egin zion bisita, larunbat iluntzean, eta 52-58 nagusitu zen talde hernaniarra.
Baina ez zen lan erraza izan; are gehiago, azkeneko laurdenean eman zion buelta markagailuari, Hernanik. Izan ere, sei puntu atzetik iritsi zen, azkeneko 10 minutuetara. Berdinduta hasi zen partidua, eta abantaila txikiarekin iritsi ziren hernaniarrak, aurreneko laurdenaren bukaerara (15-18) eta atsedenaldira (27-29). Baina aldageletatik bueltan, aurretik jarri eta ihes egin zuen Askatuakek, hirugarren laurdena 44-38 bukatzeraino. Azkeneko laurdenean, ordea, bikain aritu ziren hernaniarrak, eta 8-20 partzialarekin, garaipena ekarri zuten.
Hirugarren laurdenean ihes garaipenak, Mundarrori
Hirugarren laurdena izan zuen txarra, Mundarrok ere. Baina astigartarrek ezin izan zioten buelta eman, gero. Kiroldegian jokatu zuten, igande goizean, etxeko aurreneko partidua; eta 48-56 galdu zuten, Iraurgiren kontra. Talde azpeitiarra aurretik izan zen markagailuan, hasieratik; baina eutsi zioten astigartarrek, atsedenaldira bitarte (10-11 eta 17-20).
Hortik aurrera, baina, tartea asko haunditu zuen Iraurgik, eta 29-44 bukatu zuten hirugarren laurdena. Saiatu ziren astigartarrak, eta baita gerturatu ere, azkeneko laurdenean 19-12 partziala eginda; baina gehiegizkoa zen, pilatutako desabantaila.