Denontzat taldeko Ismael Mateo, Lucio Roman eta Izaskun Cantabella Estatu Batuetako Tahoe lakuan izango dira igandean, bertan jokatuko den Spartan Race oztopo lasterketako Munduko Txapelketan parte hartzeko.
Euskaldun gutxi iritsi dira maila horretara, lehenago. Izan ere, txapelketa nazionalean eta Europakoan sailkatzea lortu behar da. Era berean, «gastuak gure gain hartu behar ditugu: bidaia, dortsala, ostatua...», diote kirolariek.
Cantabella, aurreneko emakume gipuzkoarra
Hirurek gogor egin dute lan honaino iristeko. Martxoan hasi zuten lehia, Mallorcako Spartan proban, eta ondoren, Madril eta Andorrakoak jokatu zituzten, liga nazionalean. Horiek denak gaindituta lortu zuten Europakoetara iristea; Dolomitetan jokatu ziren, ekainean.
«Entrenamendu fisiko eta mentala lantzen hilabete asko pasa ditugu, probak prestatzen kontzentratuta aritzeko», dio Izaskun Cantabellak. Udara osoa pasa dute lanean Munduko Txapelketa honetara iristeko, baina lortu dute, eta ez da gutxi! Hain zuzen, Izaskun Cantabella bera, aurreneko emakume gipuzkoarra da, Munduko Txapelekta hau jokatuko duena.
Hori horrela, gozatzea dute helburua orain, Ismael Mateok azaldu bezala. «Aurten ahalegina egitea erabaki dugu. Izan ere, lortutako emaitza onek (nazionalean aurrenekoak eta Europakoan, 45-49 urte artekoen mailan, laugarrenak) mundu mailakoan parte hartzera animatu gaituzte. Eta bakarra den esperientzia bizitzera, bizitzan behin probatu behar baita».
Lucio Roman ere ados dago Mateorekin. «Munduko Txapelketa da urte gogor eta bizi bati bukaera borobila jartzeko modua. Merezi du, behinik behin, leku ikusgarriak ezagutzeko, eta maila ezin hobea daukaten korrikalariekin aritzeko aukera izateko».
Mailaz gain, eguraldiak zeresan haundia
Ez da edonolakoa, igandean Californiako Squaw Valleyren bihotzean kokatutako Tahoe lakuaren bueltan jokatuko den txapelketa. Leku hau 1960ko Neguko Joko Olinpikoen eszenatoki ere izan zen.
Oraingoan, Spartan oztopo lasterketa egingo da bertan, baina oztopoak ez dira gizakiak sortutakoak izango, naturak berak jarriak baizik. Besteak beste, 2,700 metrotik gorako altueran ibili beharko dute parte hartzaileek.
Hala ere, Denontzat taldeko kirolariak ez dira kikiltzen. «Hirurontzako helburuak argiak dira: zigorrik jaso gabe egitea lasterketa, sailkapen ona lortu ahal izateko. Top 10ean sartzea litzateke arrakasta», dio Mateok. Eguraldiari ere ez diote beldurrik. «Aurreikuspen metereologikoek elurra, euria eta hotza iragarrita ere... Ez dago hiru gipuzkoar hauentzako gaindiezina den ezer!».