Hasi da ikasturte berria, eta horrekin batera, martxan jarri dira, bai Astigarragan eta bai Hernanin, euskera ikasteko edo hobetzeko ikastaroak. Era berean, horretara animatzeko, Astigarraga eta Hernaniko Udalek hainbat diru-laguntza jarri dituzte martxan, herritarrak euskera ikastera animatzeko.
Diru-laguntzak, ia matrikula osoa ordaintzerainokoak
Astigarragan AEK euskaltegia dute herritarrek eskura, eta Udalak bertan izena emateko animatu ditu herritarrak. Aintzane Barandiaran, euskera zinegotziak Udalaren babesa adierazi dio AEKri, eta euskaltegian arituko diren Astiga-rragako herritarrentzako diru-laguntzen berri eman du.
Arazo ekonomiko larriak dituztenek eta agiri bidez justifikatu dezaketenek, matrikularen %100 jasotzeko aukera izango dute, baita 12 urtera arteko haurrak dituzten gurasoek, langabezian daudenek eta merkatariak direnek ere. Gainerako herritarrek, %75 jasoko dute ikasturte amaieran. Informazio gehiago edo euskaltegian izena eman nahi dutenek kultur etxeko bigarren pisura jo dezakete, edo telefonoz deitu 607 610 687 eta 688 746 639 zenbakietara, edo idatzi: astigarraga@aek.eus.
Hernanin ere, laguntzak ematen ditu Udalak, euskaltegiko matrikularen %70 eta 90 artean ordaintzeraino. Hauek eskatzeko, Udaleko HHZ bulegora edo Euskara Zerbitzura (udaletxeko 1go pisura) jo daiteke, edo telefonoz deitu 943 33 70 00 edo 943 33 70 29 zenbakietara, edo emaila idatzi: euskara@hernani.eus.
Hernaniren kasuan, bi euskaltegi daude, aukeran: AEK (Larramendi kalea 11) eta Udal Euskaltegia (Karobieta 63, anbulatorio zaharra). Azken honetan, talde batzuetan tokia dagoenez, matrikula epea luzatu dute ostiralera arte.
Mintzapraktika saioak ere, martxan
Bestalde, Hernaniko Dobera Euskara Elkarteak mintzapraktikarako taldeak osatzen ditu, elkarrekin euskeraz komunikatzeko, dakienak ez dakienari laguntzeko, lagunartean aisialdiaz euskeraz gozatzeko.
Hauetan parte hartzea doan da. Izena emateko, deitu 943 33 27 99 zenbakira edo idatzi: dobera@dobera.eus.