Jose Olaizola Gabarain hernaniarraren heriotzaren 50garren urteurrenean, omenaldia egin nahi izan dio Gipuzkoako Filatelia eta Numismatika Elkarteak. Hilaren 28ra arte ikusi ahal izango den erakusketa jarria dauka Biterin, eta bertan egin zioten omenaldia hernaniarrari, larunbatean.
Hain zuzen, zigilu edo seiloa eta tinbre edo zigilu-marka sortu dituzte, Jose Maria Rezolak egindako Olaizolaren erretratoarekin. «Ohorea da haren irudia eta euskal kultura eta musikaren alde egin zuen lana betikotzea, seilo honen bitartez», azaldu zuten antolatzaileek. Jose Olaizola 1883an jaio zen Hernanin, eta 1989an hil, Donostian, musikari, konpositore, organista, zuzendari eta antzerki munduko lanetan ibili ondoren.
Omenaldian Olaizolaren bilobak «eskertuta» agertu ziren, «aitonaren lana jasotzen dituen seiloa, tinbrea eta biografia azaltzeagatik». Xabier Lertxundi, Hernaniko alkateak, berriz, hernaniarraren bizitzako bi arlo nabarmendu zituen: «hezkuntzan egindako lana, musikarien irakasle ere izan baitzen, eta erakutsitako euskaltzaletasuna. Euskaltzaindiako kide ere izan zen. Bidaiatzea hain erraza ez zen garai batean, Hernani munduan barrena zabaldu zuen, eta zigilu-marka honi esker, are gehiago zabalduko da orain Olaizola, munduan zehar».