ETxean egin zuten denboraldiko debuta, joan den asteburuan, Euskal Ligako neska hernaniarrek. Eta jasotako porrotari buelta emateko, etxean aritzea tokatuko zaie gaur. Barakaldoren zelaian ariko dira, La Sieben, arratsaldeko 17:30etan hasita. Estreinakoan galtzetik dator talde bizkaitarra ere.
Eta alderantziz, etxean jokatuko dute aurrenekoz, Hernani eta Mundarroko mutilen talde nagusiek.
Erregionalen Ohorezko Mailan, Touring hartuko du Hernanik, Zubipen, arratsaldeko 16:30etan hasita. Txuri-berdeek ondo ekin diote denboraldiari, Beti Gazteren zelaian irabazita; eta hasiera onari segida eman nahi diote, zaleen aurrean. Hiru punturekin dator talde donostiarra ere, Real Union hartu baitzuen menpean, aurreneko partiduan.
Ia aldi berean estreinatuko dira etxean, Mundarroko Erregional Preferenteak ere. Arratsaldeko 16:00etan hasiko dute partidua, Zarkumendegin, Donostiako Kostkasen kontra. Moreek ez zuten nahi bezain ondo hasi denboraldia, Deustoren zelaian 2-0 galduta; eta hiru puntuak etxean geratzera nahi dute, gaurkoan.
Etxean ariko dira, baita ere, Liga Nazionaleko jubenil hernaniarrak; baina beraiek kasuan, ez da estreinakoa izango. Dagoeneko jokatu dituzte bi partidu, denboraldi honetan, eta etxean jokatu zuten aurrenekoa. Orain arte, emaitzak ez dira nahi bezalakoak izan, jokatutako bi partiduak galduta. Eta aurreneko puntuak eskuratzeko gogoz ariko dira Zubipen gaur, seniorren partidua bukatzen denean, 18:30etan. Aurrera de Vitoria talde arabarra izango dute bisitan. Puntu bakarrarekin daude gasteiztarrak, sailkapenean.
Beste sei partidu etxean, bailarako taldeek
Gainerakoan, hiruna partidu gehiago jokatuko dira asteburu honetan, Hernanin eta Astigarragan: Zubipen, mutil kadeteek jokatuko dute gaur 10:00etan eta 12:00etan, eta neska kadeteek bihar 12:00etan; eta Zarkumendegin, mutil jubenilek bihar 10:00etan, mutil kadeteek gaur 18:15etan, eta neska kadeteek bihar 12:15etan.