Hainbat konponketa eta hobekuntza lan egiteko aprobetxatu du udara, Astigarragako Udalak. Zehazki, herriko zenbait kale edo gunetan aritu dira lanean, eta baita eraikin publikoetan ere, Herri Eskolan, udaletxean, kiroldegian edota Haur Eskolan, esaterako.
Kaleko lanen artean, Ergobiako zubiaren ondoko aparkalekua egokitu dute, eta baita hondakin ontzien gunea ere. Santio Zeharran, berriz, argiztapena indartu dute, Rezola sagardotegiaren eta Arkubide baserriaren arteko zatian. Eta herriko beste hainbat gunetan, kaleko altzariak txukundu dituzte, «integrazioa sustatzen duen Beterri Errotuz elkarteko langileen laguntzaz».
Eraikin publikoetako lanei dagokienez, berriz, kultur etxe berriaren automatizazioa gauzatzeko lanak egin dituzte, eta kultur etxe berria eta udaletxea zuntzaren bidez konektatu dituzte. Herri Eskolan ere egin dituzte hainbat lan: «irakaslegoarentzat Officea egokitu da, sabaiatu eta argiteria berritu, margoketa lanak egin, komun txikiak egokitu...», azaldu dute Udaletik.
Kiroldegian, berriz, ur instalazioa berritu dute, eta konpondu dituzte spinning gelako sabaian zeuden akatsak. Eta Haur Eskolan, azkenik, estalki txiki bat jarri dute atarian.
Herriko plano toponimiko berria, laster argitara
Datozen hilabeteotarako, berriz, hamar lan aurreratu ditu Udalak, «laster ikusi ahal izango direnak». Horien artean dago, esaterako, herriko plano toponimiko berriaren argitalpena. Bestalde, kanpaina jarriko dute martxan, etxebizitzetan edateko ur instalazioetako kontagailuak berritzeko. Oialume errekara isurtzen diren ur zikinen inguruko azterketa ere egingo dute, eta Donostia ibilbidea berrurbanizatzeko lanen bigarren fasearen proiektua idatzi.
Obra lanei dagokienez, Galtzaur kaleko argiztapena berrituko dute, eta bide publikoetan zenbait margoketa lan egin. Herriko hainbat gunetan, gainera, landaredia lanak egingo dituzte, eta Mendiaundi-Anibar orubeko sastraka kendu egingo dute, baita ere.
Eta azkenik, Haur Eskolako pertsianak aldatuko dituzte.