Asteazkenean jokatu zuten, bazkari baten bueltan, Kizkia Taldeko Sagardo Txapelketaren finala. Eta Adunara joan zen txapela, Aburuza sagardotegiarekin. 118 punturekin nagusitu zen, Urnietako Eula (115,5 puntu) eta Astigarragako Petritegi (113 puntu) sagardotegien aurretik. Beste bi astigartar ere baziren, finalisten artean: Rezola eta Alorrenea, laugarren eta bosgarren. Asteasuko Sarasolak itxi zuen finaleko sailkapena, seigarren.
Giro ederrean egin zuten finaleko bazkaria, sei sagardotegi finalistak zein ziren jakin gabe; sari banaketara arte, sekretupean gorde baitzituzten.
20 sagardotegik ekin zioten txapelketari, abuztuaren 28an eta irailaren 4an jokatu zen aurreneko kanporaketan. Petritegik lortu zituen puntu gehien orduan, Eula eta Alorrenearen aurretik. Eta sei finalistekin batera, beste lau sailkatu ziren bigarren kanporaketara: Astigarragako Lizeaga, Aiako Izeta, Zubietako Astiazaran, eta Lizartzako Goikoetxea.
Bigarren kanporaketa horretan, Aburuza sailkatu zen lehenengo, Petritegi eta Eularen aurretik. Haientzat izan ziren sariak, asteazkenean.