Txotx garaiaren hasiera bakarrik ez, sagarra biltzen hasteko garaia ere oso garrantzitsua da, Astigarragako sagardotegietan. Eta azkeneko urte luzetan bezala, ospakizun bilakatuko dute, datorren astean. Sagar Uzta Jaiaren 19garren edizioa egingo dute, ostegunetik igandera.
Ohiko pintxopotearekin hasiko dute ostegunean, sagarraren eratorriekin egindako pintxoak izango baitira, herriko tabernetan. Larunbatean helduko diote berriro, Sagar Bira mendi bueltarekin, Santiomendiko Sagardo Bidean zehar. Horretarako izena eman behar da, eta baita igandean izango diren beste hiru ekintzatarako ere: Argazki Rally Digitala, sagar mermelada tailerra, eta muztioaren elaborazioa. Sagarraren Jaiaren barruan egingo dituzte horiek, Foru Plazan.
Hori baino lehen, Ergobiko plazan izango da zita garrantzitsua, larunbatean: Euskal Herriko Sagardo Txapelketa Herrikoiaren finala jokatuko da, 12 sagardo onenen artean.
IRAILAK 26, osteguna
19:00-21:00, Pintxopotea, Astigarragako tabernetan. Sagarraren eratorriekin egindako pintxoak eskainiko dira.
IRAILAK 28, larunbata
09:30, Sagar Bira: Santiomendiko Sagardo Bidean zehar mendi buelta, familian*.
20:00, Euskal Herriko V. Sagardo Txapelketa Herrikoiaren finala, Ergobin.
IRAILAK 29, igandea
Sagarraren Jaia, Foru Plazan
09:30, Txirrisklako txistularien diana.
10:30-12:00, XII. Sagar Uzta Argazki Rally Digitalean izenematea, plazan*.
11:00-14:00, Sagarraren azoka: sagar mermelada tailerra*; sagarren erakusketa, dastaketa eta salmenta; sagardo eta muztio dastaketa; saski, txertaketa eta abarren erakustaldiak; herriko baserritarren produktuen salmenta; eta trikitilariak herrian zehar.
11:00, Muztioaren elaborazioa: sagar biltzea, jotzea, eta zanpatzea, bertaratutako familien laguntzarekin*.
12:30, Sagar dantza eta kirikoketa.
13:00, Txalaparta, eta 2019 uztako lehen muztioaren topa herrikoia.
14:30, Herri bazkaria.
16:30, Euskal Herriko aizkolari gazteen txapelketa.
17:15, Afizionatuen pelota partidua.
*Izenemateak aldez aurretik: www.sagardoarenlurraldea.eus, info@sagardoarenlurraldea.eus, edo 943 55 05 75