Iraila izaten da alor desberdinetako elkarteetan izena emateko garaia, udara amaitzear dagoenean, eta euskera elkarte eta euskaltegien egitasmoetan ere horrela izaten da. Ikasturte berriarekin batera Dobera Euskara Elkarteak eta Udal eta AEK euskaltegiek hernaniar ikasleak animatu zituzten, atzo, egoitzetara hurbildu eta eskaintzen dituzten ikastaro, ikasketa eta praktiketan izena ematera.
Oier Agirresarobe zinegotziak ireki zuen aurkezpena eta Hernaniko euskeraren erabileraren eta ezagutzaren datuak eman zituen bien arteko aldea nabarmenduz. Ondoren hitza pasa zien elkarte eta euskaltegietako kideei eskaintzen dituzten aukera zabalak azpimarratuz.
Joseba Arbelaitz, Udal euskaltegiko ordezkariak, nabarmendu zuen izen emateko epea astebete luzatuko dutela datorren astera arte. «Hasiera emateko prest gaude. Ikasleen helburua era askotakoa da: ulermen maila lortzeko, maila hobetzeko, titulua ateratzeko, mintzapraktiketarako... eta eskaintza ere zabala da». Ildo berean mintzatu zen AEKko Ixiar Eratsun. «Jendeak dauzkan beharrak asetzea da helburua. Tituluak lortzeko hasieratik C2 mailara iristen gara. Etorkinentzako talde bat eduki genuen iaz, ikastetxeetan lortu genuen guraso talde bat edukitzea, haur eskolentzako langileentzat...».
Dobera Elkarteko Lander Ibarburu teknikariak mintzapraktikak egiteko aukera dagoela elkartean nabarmendu zuen. «Mintzalagun programaren barruan talde desberdinak osatzen dira. Horretarako egoitzara hurbildu besterik ez da egin behar eta talde batean sartzen da euskalduna edota euskaraz hitz egin nahi duen edozein».