IBILI gurekin leloarekin abiatuko da mugikortasun astea Astigarragan datorren asteazkenean. Lau egunez luzatuko dira ekintzak; asteazkenetik larunbatera bitartean.
Mugitzeko era jasangarri eta osasuntsuak indartzea da helburua mugikortasun astean. Horretarako, Ingurumen sailak zenbait ekintza antolatu ditu eta herritar guztiei parte hartzeko deia zabaldu die.
Ekintza gehienak Joseba Barandiaran plazan edo plazatik abiatuta
Etzi hasiko dira ekintzak eta bizikleta elektronikoak probatzeko aukera egongo da 15:00etatik 18:00etara, Joseba Barandiaran plazan. Ondoren, indarberritzeko txokolatea bizkotxoekin banatuko da. 18:30etan.
Pasa den urteko esperientzia errepikatuz, ostegunean, gimnasia egongo da, 11:00etatik 12:00etara
Ostiralean Martutenera ibilaldia egongo da bidegorrian zehar, eta bueltan udaletxean pikoteoa. Hitzordua 11:00etan jarri da Joseba Barandiaran plazan. Amaitzeko, larunbatean patinetan txangoa antolatu da herrian zehar, eta ondoren, jolasak egongo dira frontoian. 11:00etatik 13:00etara egingo da eta kaskoa eta babesak eramatea beharrezkoa da.