Behin irailean sartu eta ikasturte berriari hasiera ematean, berriro ekingo zaio Berriketan programari, Ereñotzun, Auzo Udalak jakinarazi duenez. Era berean, yoga eta aerobik egiteko aukera ere izango da.
Berriketan, asteazkenero
Adinekoei zuzendutako programa da, Berriketan. Asteazkenero nahi dutenak Auzo Etxean elkartzen dira, arratsaldeko 17:00etatik 19:00etarako tartean, eta aukera izaten dute karta jokoetan, partxisean, sudokuetan edota, besterik gabe, tertulian aritzeko. Eta bukatzeko, nola ez, merienda izaten dute aukeran.
Aurten, ikasturteari irailaren 11n emango diote hasiera, eta hortik aurrera, asteazkenero elkartuko dira. Edonork hartu dezake parte, aurretik izena eman beharrik gabe. Bertara azaltzea nahikoa da, eta debaldekoa da.
Yoga eta aerobik egiteko, izena eman beharra
Urrian, bestalde, yoga eta aerobik ikastaroak hasiko dira, berriro. Yoga astearte eta ostegunetan egin ahal izango da, 17:00etatik 18:30etara, eta aerobik, astelehen eta asteazkenetan, 17:30etatik 18:30etara.
Izena irailaren 9tik 13ra eman behar da, Auzo Udalean.