Junior mailako txirrindularientzat gertu dago errepideko denboraldiaren bukaera. Asteburu honetako Udazkeneko Kriteriumnarekin bukatuko dute.
Bi lineako probek osatutako orokorra eta erlojupekoa izango dituzte egin beharreko lanak, gaur eta bihar. Hasteko, Oñatin ariko dira gaur goizean, 83 kilometro luze eta 5 portu dituen ibilbidea egiteko. Eta bihar, Liernian, 55 kilometroko ibilbidea egin beharko dute goizean, baina 5 portukoa, eta bukatzeko, Seguratik Lierniara erlojuaren kontrako proba egin beharko dute sailkapen orokorrean aurrena dijoazten 45 txirrindulariek.
Ibarran eta Beasainen, joan den asteburuan
Lehendik ere lan majo eginda iritsiko dira gaurko probara, txirrindulari astigartar eta hernaniarrak. Lehengo ostiralean, adibidez, Ibarrako XXXVIII San Bartolome Saria jokatu zuten 86 txirrindularik; Altzoko portura hiru aldiz igo behar izan zuten, 86 kilometroko ibilbidean zehar. Irabazlea Lizarte Ermitagañako Mikel Retegui izan zen, ihesaldian ondoan izan zituen Bellotako Xabier Isasa eta Lintxu Fundazioko Daniel Morales gaindituta. Honekin, Euskal Herriko Torneoa ere irabazi zuen Reteguik. Telmo Semperena astigartarra 11garren izan zen, eta Ibai Rodriguez hernaniarra, 26garren.
Igandean, berriz, juniorren egutegiko proba garrantzitsuenetakoa jokatu zuten; Beasaingo Mundialaurreko Klasika. Denera, 179 txirrindulari elkartu ziren irteera lerroan, 114 kilometro eta 5 portuko lasterketari aurre egiteko. Eraso eta ihesaldi asko izan ziren, eta pelotoia desegin zuten. Txapelduna Bellotako Xabier Isasa izan zen, ihesean zijoazten 6 txirrindulariren artean aurrea hartu, eta Olaberriarako igoeran erasoaldiari jota helmugara bakarrik iristea lortuta. Bigarrena Toledo Oid Cicling Teameko Pablo Carrascosa izan zen; baita mendiko txapelduna ere. Hirugarren, Leongo Arte en Transfer taldeko Guillermo Thomas Silva izan zen.
Donosti Berriko Telmo Semperena astigartarrari dagokionez, hainbat ihesalditan hartu zuen parte. Lierniarako igoeraren aurretik azken erasoaldiari jo zion, aurrerago ihes eginda zijoaztenak harrapatu nahian, baina ez zuen lortu, eta 8garren iritsi zen.?Ampoko Enekoitz Azparren, berriz, 13garren izan zen, eta Ibai Rodriguez hernaniarra 41garrena, proba bukatzea lortu zuten 113 txirrindulariren artean.