[Babestutako edukia]
Ikasturte berriaren hasiera izan ohi da promesak egiteko garaia. Hizkuntzak ikasi, kirola egin, antzerkian edo dantzan hasi... Horietan denetan, bada apustu segurua den hautua: norberaren hizkuntza propioa hobetzea. Buruntzaldea eskualdeko euskaltegiek eskaintza zabala dute 2019-2020 ikasturterako, ordutegi eta maila guztiekin. Bada, gainera, beste abantaila bat. Eskualdeko udalen helburua matrikulazioak bultzatzea da, eta, horretarako, diru laguntza sortak eskaintzen dituzte. Laguntza horiek HABEk ematen duenarekin bateragarriak dira. Horrenbestez, Buruntzaldeko herritarrei ia doan, eta kasu askotan, doan atera dakieke ikastaroa; apustu segurua da euskara ikastea.
Ikasturtea hastera doa. Iaz, 2017-2018koan, 924 ikasle aritu ziren euskaraz ikasten Buruntzaldeko euskaltegiren batean. Gehienak, emakumeak: %67,9. Eskualdeko Euskara Zerbitzuen helburua da ikasle gehiago izatea; 1.000 ikasleetara iristea dute buruan.
Oraindik 2018-2019 ikasturteko datuak itxi gabe dituzte, eta, beraz, irail amaiera arte ezingo dira matrikulazioen behin betiko kopuruak jakin. Edonola ere, orain arte bildutakoei erreparatuta, baikor agertu dira eskualdeko euskara teknikariak. Udarako ikastaroen datuen faltan, matrikulazio gutxi batzuk behar dira muga hori gainditzeko.
Zortzi euskaltegi daude guztira eskualdean. Bina Lasarte-Orian eta Hernanin, eta bana Urnietan, Hernanin, Andoainen eta Usurbilen.
«Ez zitzaidan bidezkoa iruditzen nire hizkuntza menperatu gabe beste bat ikasten hastea»
Eskualde osoko eskaintza aintzat hartuta, non aukeratua badago. Astelehenetik ostiralera, zortzi euskaltegi horietan bakoitzaren beharren araberako ikastaroak ematen dituzte. Hasteko, maila aldetik; A1, A2, B1, B2, C1 eta C2 egiteko aukera dago. Baita ordutegi aldetik ere; eskolak goizetan, eguerditan eta arratsaldetan, iluntzera arte daude. Nork bere kabuz autoikaskuntzan ikasteko abagunea ere badu. Tutoretzak, programazio pertsonalizatuak eta mintza-saioak eskaintzen ditu ikastaro mota horrek.
Eskolez gain, beste alderdi praktikoagoa ere eskaintzen dute euskaltegiek: Mintzalaguna egitasmoaren bidez, astean behin 5-6 pertsonako taldeekin biltzeko aukera dago, euskaraz aritzeko. Beste ekintza osagarriak ere eskaintzen dituzte euskaltegiek, hala nola, irteerak, txangoak...
Udalen laguntza
Buruntzaldeko udalek ematen dituzte diru laguntzak euskara ikasteagatik. Halere, herri bakoitzean laguntza horiek jasotzeko baldintzak eta diruz lagundutako kopuruak desberdinak dira. Baina badira ezaugarri komun batzuk. Esaterako, gutxieneko asistentzia bete behar da, eta erroldatuta egon behar da herrian bertan. Langabetuei are laguntza handiagoak ematen dizkiete; %100 kasu batzuetan, 500, 600 edo 664 euro arteko mugapean, aldeak baitaude herri batzuetatik besteetara.
Horrez gainera, HABE Helduen Alfabetatze eta Berreuskalduntzerako Erakundeak ere laguntzak ematen ditu. Ondokoak dira baldintzak: batetik, 2018ko martxoaren 23tik 2019ko abuztuaren 31ra bitarteko epealdian euskaltegi edo euskararen zentro homologatu batean matrikulatuta egon beharko da; bestetik, 2018-2019 ikasturtean HABEren maila bat edo baliokideren bat egiaztatu beharko da. Diru laguntza horiek egiteko eskabidea 2019ko irailetik aurrera egin daiteke.
Hain zuzen, diru laguntzek erakarrita ematen dute izena ikasle batzuek. Askotariko arrazoiak dituzte euskara ikasteko. Batzuek lana dela-eta titulu ofizialen bat atera nahi dute. Pili Meiraren kasua da. Astean 7 ordu eta erdi ematen ditu, arratsaldetan. «Goizetan lan egiten dut, gero ume txikiekin nabil, baina denbora ateratzen dut. Merezi du ahaleginak».
Autoestimak gora
Jonek, ordea, ez du titulurik behar. «Aspaldi euskara landu gabe nuen, eta konturatu naiz asko dakidala. Autoestimua asko indartu dit euskaltegiak. Ingelesa nahi nuen ikasi, baina ez zitzaidan bidezkoa iruditzen norberaren hizkuntza menperatu gabe beste bat ikasten hastea».
BURUNTZALDEKO UDALEN DIRU LAGUNTZAK
Andoain
-Baldintzak: Andoainen
erroldatuta egotea. Gutxieneko asistentzia: %85.
-Diru laguntza: Matrikularen %85 guztiei; familia ugarikoak edo diru sarrera murriztuak dutenei, %100. Autoikaskuntza, %100.
664ko muga.
Astigarraga
-Baldintzak: Astigarragan erroldatuta egotea. Gutxieneko
asistentzia: %85.
-Diru laguntza: Kasu guztietan 600 euroko muga izango du laguntzak. Matrikularen %75. Langabetuei, merkatariei eta 12 urtetik beherako haurren bat dutenei: %100.
Hernani
- Baldintzak: Hernanin
erroldatuta egotea. Gutxieneko asistentzia: %85.
-Diru laguntza: Matrikularen %70. Langabeei, %90. 500
euroko muga.
Lasarte-Oria
- Baldintzak: Lasarte-Orian erroldatuta egotea. Gutxieneko asistentzia: %85..
-Diru laguntza: Matrikularen %85.
Urnieta
-Baldintzak: Urnietan
erroldatuta egotea. Gutxieneko asistentzia: %80.
- Diru laguntza: Langabeei, %100. Besteei, %85. 500 euroko muga.
Usurbil
- Baldintzak: Erroldatuta
egotea. Gutxieneko asistentzia: %80.
- Diru laguntza: Guztiei,matrikularen %100. 600euroko muga.