Energia Iraunkorrerako Udal Planaren barruan ebaluaketa jarraia egiten du Udalak, azaldu dutenez, «udal eraikinetan eta kaleko argiterian kontsumitutako energiaren kudeaketa ahalik eta eraginkorrena izan dadin». Horretarako, SIE sistema erabiltzen dute, hau da, Informazioa eta Energiaren Kudeaketa Sistema.
Hobetzeko ekintzak eginda
Prentsa-oharrean azaldu du-tenez, Energia Plana garatzen hasi zenetik, energiaren eraginkortasuna hobetzeko zenbait ekintza egin ditu Udalak. Horien artean, nabarmendu dituzte instalakuntzen berritze, kontrol eta jarraipenak, edota teknologia zaharren ordezkapena (kaleko argiztapena LED teknologiara aldatu, biomasa bidezko galdara kiroldegian...).
2015 eta 2018 alderatuta
Ekintza horiek guztiek energiaren kontsumoan, fakturan eta negutegi efektua areagotzen duten gasen isurketan izan duten eragina zenbatu berri du Udalak. Eta bilakaera ikusteko, 2015 eta 2018ko datuak alderatu dituzte.
Azaldu dutenez, «Udalaren 2018ko kontsumoa, guztira, 6,3 milioi kWh-koa izan zen, eta energia faktura, 708.000 eurokoa. Berotegi efektuko gasei (BEG) dagokionez, 226,6 karbono dioxido tona baliokideren isurketa izan zen iaz».
2015eko datuak ere eskaini dituzte, eta biak alderatuta, «kontsumoa jaitsi da (-%1,8), baita faktura ere (-%9,7). Jaitsiera nabarmenena BEG isurketena izan da, %74,8koa izan baita (671,58 tCO2 baliokide)».
Hiru arrazoi eman ditu Udalak horretarako:?«kontsumoaren murrizketa, energia berriztagarriaren aldeko apustua (biomasa), eta egun kontsumitzen den argindarraren jatorri berriztagarria (jatorri berriztagarri ziurtagiridun elektrizitatea kontsumitzen da)».
«2018ko kontsumoa, guztira, 6,3 milioi kWh-koa izan zen, eta energia faktura, 708.000 eurokoa»
50tik gora eraikin eta lokal
Aztertu direnen artean, Hernaniko Udalak dituen 50tik gora eraikin eta lokal daude, baita 91 argiztapen-eremu ere. Horietatik, kontsumo gehiena dutenak kirol, kultura eta hezkuntza arloko azpiegiturak direla adierazi dute. Hain zuzen, kiroldegia da kontsumo haundiena duena, eta segidan daude Urumea ikastola eta Biteri kultur etxea.
Horrez gain, azterketaren ondoren Udalak ondorioztatu du «oraindik hobetzeko aukera» dagoela.