Ikasturtea hasteko, mintegi berezi bat antolatu du Udal liburutegiak: Emakumeen euskal literatura ikuspegi feministatik. Kattalin Miner hernaniarrak gidatuko du, eta lau saio egingo dituzte, hilaren 17an hasi eta abenduaren 17ra bitarte.
Ikuspegi feministatik irakurtzeko tailerra
Lau saio izango dituen mintegia izango da. Aurreneko saioa hilaren 17an izango da, eta hilabetean behin egingo dira gainontzeko saioak, abendura arte: urriaren 15ean, azaroaren 12an eta abenduaren 17an, hain zuzen. Saio guztiak arratsaldeko 19:00etan hasita izango dira, liburutegian bertan.
Kattalin Minerrek berak azaldu duenez, «euskal, eta zehazki, euskerazko emakume idazleen lan garaikideak ikuspegi feminista batetik irakurtzeko tailerra izango da hau. Hala, azken urtean argitaratu diren lanak irakurriko ditugu, egungo testuinguru eta bizipenetatik. Helburua da euskal emakume idazleak ezagutaraztea, eta egun garatzen diren kezka, diskurtso eta proposamenak denen artean hausnartzea eta horiek, genero ikuspegi eta ikuspegi feminista batetik irakurtzea».
Horretarako, saio bakoitzean, liburu bat landuko da: hilaren 17an, Eider Rodriguezen Bihotz Handiegia; urriaren 15ean, Uxue Alberdiren Jenisjoplin; azaroaren 12an, Katixa Agirreren Amek ez dute; eta abenduaren 17an, Alaine Agirreren Odol Mamituak.
Lau saiotan egingo da mintegia, eta saio bakoitzean liburu bat landuko dute partehartzaileek.
Izenematea aurrez, liburutegian
Mintegian parte hartu nahi duten 16 urtetik gorakoek, aurretik eman dezakete izena, liburutegian bertan. Horrez gain, landuko diren liburuak behar dituenak ere, bertan eskatu ditzake.