Ikasturte berriari festa giroan ekin ohi diote Zikuñagan, auzoko festekin. Eta hala egingo dute beste behin, gaurtik. Lau egunez izango dira ekintzak, igande gauera bitarte.
Hiru zita jarri dituzte, gaur arratsalderako. Hasteko, pala txapelketa jokatuko dute beste urte batez, 17:00etatik aurrera. Baina ondoren, nobedade bat prestatu dute: aerozumbarekin jarriko dituzte denak dantzan, 19:00etan hasita. Eta azkenik, beste klasiko bat: futbolin txapelketa jokatuko da, 20:00etan.
Haurren moto lasterketak eta ?playback? lehiaketa, bihar
Ekintza gehiago izango dira bihar arratsaldean. 18:00etan aterako dira buruhaundiak, Las Pu?n?tilloren musikak alaituta; eta segidan izango da, urtero ikusmin haundia pizten duen ekintzetako bat: 6 urtetik beherako haurren moto lasterketa. Gero, Apaxi ipuin kontalariaren istorioak entzungo dituzte 19:30etan, eta musikak jarriko du saltsa, gauean: playback lehiaketa 22:30etan, eta Zutik Elektrotxaranga gauerdian.
Hortik aurrera, etenik ez du izango festak, asteburuan. Haur eta gaztetxoen jolasak, tortilla lehiaketa, sagardo dastaketa, ginkana, herri kirolak edota danborrada, larunbatean; eta igandean, Ozenki abesbatzak kantatuko du Zikuñagako Amaren omenezko mezan, eta bakailu lehiaketa, paellada herrikoia edota apar festa ere izango dira. Eta bi egunetan, DJ Nemuxekin dantzaldia.
Beraz, oporraldia bukatu izanaren penak alaitu nahi dituenak, aurkituko du zerekin gozatua, Zikuñagan.