Gero eta indar gehiago dauka boleibolak Hernanin, eta horren erakusle da, denboraldi berrirako talde kopurua bikoiztekotan dela Hernaniko Boleibol Taldea. Izan ere, hasiera batean lau talde aurreikusten zituzten arren, badirudi sei talde osatzera iritsiko direla.
Senior mailako bi taldeak izango dira nobedade nagusia. Horrela, mutil seniorren talde bat izango da, aspaldiko partez, urtetan mutilen talderik ez izan ondoren. «Mutilak boleibolera erakartzea» izango da helburu nagusia, horrekin.
Nesketan ere, talde bat izango du Hernanik, seniorretan. Entrenatzeko kantxa arazoak tarteko, talde horretan ariko dira neska seniorrak zein jubenilak, elkarrekin.
Seniorren bi taldeak, atzo hasi ziren entrenatzen, eta astelehen, asteazken eta ostiraletan izango dituzte saioak.
Neska kadete eta infantilek, bina talde ziurrenik
Beranduago hasiko dira lanean, neska kadete eta infantilen taldeak; eta horietan ere, bada nobedaderik. Izan ere, bi talde izango dira maila bakoitzean, ziurrenik: «talde bana aurreikusten genuen, baina dagoeneko bina talde ateratzeko adina neskak eman dute izena, eta urte bakoitzeko talde bana izango da. 2007an jaiotakoen taldean bi plaza geratzen dira, 2006koen taldean hiru, eta 2005 eta 2004koen taldeetan launa». Boleibolean aritu nahi duten neska-mutilek, aukera dute oraindik ere: 656 731 929 telefonoan edo whatsappez.
Neska kadeteak irailaren 9an hasiko dira lanean, astelehen, asteazken eta ostiraletan. Eta neska infantilak, azkenik, irailaren 25ean: «ordurako, entrenatzeko kantxa arazoa konpondu beharko dute kirol arduradunek. Gaur egun, soilik ostiraletan daukate ordu eta laurden entrenatzeko, eta hori konpondu beharra dago», diote Boleibol Taldetik.