Aurten ere ez dute huts egingo, eta beste behin, ikasturte hasiera alaitzeko parada ederra eskainiko dute Zikuñagako bizilagunek, auzoko festekin. Lau egunez izango da jai giroa auzoan, etzi hasita.
Eta martxan jartzeko, ostegun mugitua prestatu dute. Izan ere, ohikoak diren pala eta futbolin txapelketei, hirugarren ekintza bat gehitu diete, estreinako egunean: aerozumba saioa izango da, arratsaldeko 19:00etan hasita. Hori baino lehenago ariko dira palan, 17:00etatik aurrera; eta ondoren futbolinean, 20:00etan.
Eta arratsaldez izango dira ekintzak, ostiralean ere, asteburu beteari bidea egiteko. Horrela, jaien bigarren egunean, zenbait klasiko: buruhaundiak Las Pu?n?tilloren musikarekin, 6 urtetik beherakoen moto lasterketa, edota Apaxi ipuin kontalariaren saioa. Eta saltsa jarriko duten beste bi ekintza, gauean: playback lehiaketa, joan den urtean abiatu zutena; eta Hernaniko Zutik Elektrotxarangaren emanaldia.
Mus txapelketa eta bakailu lehiaketa, nobedadeak
Asteburuan izango dira ekintza gehien, ohi bezala, eta zenbait nobedade ere izango dira aurten. Hori horrela, Zikuñagako Jaiak Mus Txapelketaren aurreneko edizioa jokatuko dute larunbat gauean, danborradaren ondoren; eta igandean, bakailu lehiaketa egingo dute, goizean. Ez dira faltako, haur jolasak, tortilla lehiaketa, sagardo dastaketa, paellada herrikoia, apar festa...