Irailaren 16an hasiko da 11/13 sumarioko makroepaiketa, Espainiako Auzitegi Nazionalean. Terrorismo delituak egotzita, 47 pertsona auziperatu dituzte, tartean dira Herrira, Etxerat, Jaiki Hadi eta Euskal Preso Politikoen Kolektiboaren Bitartekaritza Taldeko kideak, baita abokatuak ere.
Aiert Larrarte hernaniarra eta Amaia Esnal urnietarra dira horietako bi. Haiei elkartasuna adierazteko, elkartasun asteburua antolatu dute Hernanin eta Ereñotzun.
Hitzaldi bana, ostegun
eta ostiralean
Ostegunean emango diote hasiera ekintzei. Orduan, hitzaldia eskainiko dute biek Ereñotzun; 19:00etan izango da, ludotekan.
Gauza bera egingo dute ostiralean, Hernanin. 19:00etan izango da baita ere, Biterin. 20:00etan, manifestazioa egingo dute Plazatik.
Herri bazkaria, larunbatean
Larunbatean izango da, aldiz, Elkartasun Eguna. Ereñotzun egingo dira ia jarduera guztiak; horien artean, Herri Bazkaria. Bertan bazkaldu nahi duenak, asteazkenera arte izango du txartelak erosteko: Ereñotzun, Irrintzi tabernan; Hernanin, Txilin; eta Goizuetan, Amaia kafetegian.
ELKARTASUN ASTEBURUA
IRAILAREN 5A, OSTEGUNA. EREÑOTZUN.
- 19:00etan, hitzaldia ludotekan. Hizlariak: Amaia Esnal eta Aiert Larrarte.
IRAILAREN 6A, ostirala. hernanin.
- 19:00etan, hitzaldia Biterin. Hizlariak: Amaia Esnal eta Aiert Larrarte.
- 20:00etan, manifestazioa Plazan.
IRAILAREN 7a, larunbata
- 11:00etan, Jolasak/Kirolak. Haur eta gaztetxoentzat Ereñotzuko Futbol Zelaian.
- 12:30etan, Kantujira, Ereñotzun barrena.
- 13:45etan, Elkartasun argazkia, Ereñotzuko plazan.
- 14:15etan, Herri bazkaria, Ereñotzuko frontoian. Bazkalondoren, bertsoak, musika...
- 18:30etan, Kronoeskalada, Hernanin.