Asteburu osoa festa giroan igaro ondoren, agur esateko garaia iritsi zaie Latsunbeberri-Marielutseko auzotarrei ere. Gaur izango dute azkeneko eguna, ekintzaz betea, beti bezala.
Goizeko 11:00etan hasiko dute eguna, patata tortila txapelketarekin. Edonork hartu ahal izango du parte, etxetik ekarritako tortillarekin. Baldintza bakarra jarri dute: arraultzak, patata eta tipula besterik ezin izango da erabili tortila egiteko.
Hainbat sari izango dira: bi afari Latxunbe tabernan; beste bi, Tranbia tabernan; eta azkeneko biak, Zumardi jatetxean.
Ordu berean hasiko dira, baita ere, Iturritxo Elkartea VII. Esku Pelota txapelketako finalak eta talo tailerra. Bigarren hau Iturritxo Elkartearen lokalean egingo dute, 8 urtetik gorako gaztetxoekin.
Sagardo dastaketa, eguna borobiltzeko
Eguerdiko 12:00ak aldera, epaile ospetsua gerturatuko da balio anitzeko pistara, eta patata tortila guztiak dastatu ondoren, berak erabakiko du zeintzuk izango diren saridunak. Bertsolarien erritmora egingo du hori, gainera.
Segidan hasiko da sagardo dastaketa, eguna borobilduko duena. Denera, 11 sagardotegik hartuko dute parte: Altzueta, Artola, Rufino, Akarregi, Alberro, Elorrabi, Otsua-enea, Gurutzeta, Zelaia, Oialume Zar eta Itxas Buru.
Jatekoak ere ez dira faltako, eta noski, ezta musikarik ere. Bertan egongo baitira trikitilariak giroa jartzen, 14:00etan azken suziria entzun arte.
GAURKO EGITARAUA
- 11:00-12:00, Patata tortilla txapelketa. Erabili daitezkeen osagaiak: arraultzak, patata eta tipula. Balio anitzeko pistako txoznara eraman.
- 11:00-12:30, Iturritxo Elkarteko VII. Esku pelota txapelketako finalak.
- 11:00-13:00, Talo tailerra Iturritxo Elkartean (8 urtetik gorakoentzat).
- 12:00-12:30, Patata tortilla txapelketako sariak.
- 12:00, Bertsolariak.
- 12:30-13:30, Trikitilariak.
- 12:30-13:30, Sagardo dastaketa. 11 sagardo aukeran.
- 14:00, Festen bukaerako suziria.