San Agustin eguna da gaurkoa, Artikutzaren zaindaria, eta hori ospatzeko, ateak irekiko ditu, bai oinezkoentzat, baita kotxeentzat ere, aurretik baimenik eskatu gabe.
Hori, gainera, egitarau borobil baten bueltan eginen dute aurten ere.
Goizeko 11:00etan hasiko da festa, mezarekin. Bertan izango da, Egieder otxotea, girotze-lanetan. Ondoren, 11:30etan, bi pilota partidu jokatuko dituzte Goizuetako eta Oiartzungo pilotariek, elkarren aurka.
Arratsaldez, 17:30etan hasiko dira herri kirolak eta dantzaldia eginen dute gero, Gabezin taldearekin, 19:30etan.
Egun osoan zehar ez dira faltako eskulanak ikusi eta saltzeko postuak, ezta jan-edanak saltzen dituztenak ere. Artikutzako argazki zaharrak ikusteko aukera ere izanen da.
Donostiako Udalak erosi zuela, 100 urte
Nahiz eta Artikutza Goizuetako lurretan egon, Donostiako Udalak erosi zuen duela 100 urte, 1919. urtean. Hori dela-eta, Enrique Ramos Donostiako ekologia zinegotziaren esanetan, «2019a urte berezia da».
Gainera, urtegia hustu berri dute, eta laster jakinaraziko dute zer eginen duten bertan: «harekin zer egin zehaztuko duen proiektua izapidetzen ari gara. Proiektua laster aterako da lizitaziora, eta hor zehaztuko da presa erabat deuseztatuko den ala beste irtenbide batzuk hautatuko diren», azaldu du.
Jardunaldiak, urrian
Bitartean, bi liburu eskatu ditu Udalak: Aranzadi Zientzia Elkarteari, finkaren balioei buruzkoa; eta dibulgazioko bat, Dani Burguiri. Horrez gain, dokumental bat eta hitzaldi sorta bat ere eskatu dio Aranzadiri, urriaren 3an eta 4an San Telmon eginen diren jardunaldietarako.