Festak bukatuta, aldaketa nabarmena izango du gaurtik Ergobiako plazak: oinezkoentzat gune bilakatuko du Udalak, eta beraz, kotxeek ezin izango dute bertan aparkatu. Udalak adierazi duenez, «Udaltzaingoak neurri honi jarraipen zorrotza egingo dio».
Zamalanak, goizean zehar
Hori horrela, salbuespen bakarra egongo da. Astelehenetik ostiralera goizeko 08:30etatik 13:30ak bitarte irekita egongo da plaza, baina zamalanetarako besterik ez da izango hori.
Bizilagunekin prozesua, 2018ko udazkenetik
Ergobiko plaza oinezkoentzat izatea helburu izanda, hausnarketa prozesua egin du Udalak bizilagunekin. Horretarako, Aztiker Soziologia Ikergunea izan dute bidelagun; tartean izan da Susana Martinez Aztikerreko teknikaria: «2018ko udazkena eta 2019ko udara artean hainbat bilera egin ditugu bizilagunekin, betiere, norabide horrekin, Ergobiako plaza oinezkoentzat izatea erabaki zela aspaldi eta erabilera ez dela hori».
Eta hori da bizilagunei azaldu zitzaiena, Udalaren asmoa zela plaza oinezko erabilerara bideratzea.
Horretarako, «denera sei batzar egin ditugu; aurretik ere, portal bakoitzeko kezkak ere jaso ditugu», azaldu du? Martinezek.
Hasteko, diagnosia egin zuten auzotarrekin batera, eta ikusi zuten, batez ere, «zein kalte ekartzen zituen» egungo egoerak. Gainera, ikusi zuten bertaratutako gehiengoaren iritzia zela Plaza oinezkoentzat bilakatzea, betiere, «bertan dauden jarduera ekonomikoei erraztasunak emanez».
Hori horrela, pausoak ematen hasi ziren. Lehenengo, Ergobia sarreran dauden bi zonaldeak «txukuntzea» erabaki zen, bertan aparkatu ahal izateko. Bestetik, jarduera ekonomikoekin zamalanetarako ordutegia ezarri zuten.
Ergobia sarreran dauden zonaldeak hobetuta
Susana Martinezek azaldu duenez, txukunketa lan horiek udaberrian zehar egin dira, eta hortaz, «adostu moduan», horiek bukatuta jarriko da martxan.
«Zonaldea eraldaketa jasaten ari da, beraz, aldaketa egin nahi zen, obra haundirik egin gabe», eta halaxe egin dute: «horizontalki marrak margotu dira, eta batez ere, argiztapena hobetu da. Poligonora dijoan bidean kimaketa-lanak egitea falta da. Zailtasun teknikoak daude, eta horretan ari dira lanean», onartu du.
Gai bat, «zintzilik»
Dena den, gai bat «zintzilik» geratu dela dio Aztikerreko teknikariak: «auzotarrek eskatzen zuten bertan bermatzeko aparkaleku plaza bat. Hori herri-mailan hartutako erabaki bat da. Hortaz, Udalak konpromisoa hartu du aztertuko landuko duela».
Goizeko 08:30etatik eguerdiko 13:30ak bitarte irekita egongo da, zamalanetarako bakarrik.
Sei hilabete barru,ebaluazioa
Lanak eginda, beraz, gaur itxiko da Plaza, eta sei hilabeteko epean ebaluazio bat egingo dela adostu da: «bakoitzak bere esperientzia ekartzeko konpromisoa hartu da».
Jarrera ona, auzotarrek
Prozesua positiboki baloratu du Martinezek: «prozesu lasaia izan da, jarrera onekoa. Horrelako gauzak mantsoak izaten dira, baina ondo joan da. Lortu da interes indibidualetatik komunitarioetara pasatzea». Hain zuzen, horretan «akonpaintatzea» eta «pedagogikoki laguntzea» izan da Aztiker Soziologia Ikergunearen lana.