Finalerdietako Ligaxka erdibidera iritsiko da gaur, erremonteko Buruz Buruko Kutxabank Txapelketan. Barrenetxea IV hernaniarra eta Ansa II aurrez aurre izango dira; biek galdu egin zuten fase honetako aurreneko partidua, eta beraz, ezinbestekoa dute irabaztea, aurrera egiteko.
Bi puntuko abantaila, hernaniarrak
Aurreneko partiduak biek galdu bazituzten ere, Barrenetxea IVak badauka abantaila txiki bat, urnietarraren aurrean.?Izan ere, Endikaren aurrean bi puntuko aldearekin galdu zuenez, bi puntu badauzka, eta sailkapenean hirugarren dijoa, Urriza eta Endikaren atzetik; launa puntu dauzkate horiek. Ansa IIak, ordea, ez dauka punturik pilatuta, eta azkena dijoa sailkapenean. Hain zuzen, ligaxka honetan ari diren lau erremontisten artean azken postuan geratzen dena kanporatua izango da. Aurrenekoak, berriz, finalera sailkatzea lortuko du zuzenean, eta bi eta hirugarrenaren artean finalerdia jokatuko da.
Abantaila horrekin jokatzen badu ere, Barrenetxea IVak ere ezinbestekoa du irabaztea. Izan ere, gaurkoan galduz gero, azken partiduan Urrizaren kontra jokatu beharko luke, finalera pasa ahal izateko.
Hiru partidu, Galarretan
Ohi bezala, Galarretako gaurko erremonte jaialdia arratsaldeko 16:00etan hasiko da, eta Barrenetxea IV eta Ansa IIren arteko buruz burukoa bigarren partidua izango da.
Aurretik, Labaka eta Zaldua, Beñat eta Arruarteren kontra ariko dira, eta ondoren, Ezkurra II eta Larrañaga, Azpiroz eta Ionen kontra.